Botin sin gi halom didog chubasko

Deste siñko años malofan hulie` hafa mamamaila` para Marianas `nai ha tutuhon Japon mafondu gi halom chubaskon i mafananaan` Asian Flu. Guiya este `nai miyon pot miyon na salape` inbersionista (investor) manmalagnos ginen Japon.

Hu añgogho na siempre guaha plano para umatagam hafa mamamaila`. Lao hu soda` dispues na taya` plano pot este na asunto, muchomas, satton na planon ekonomia.

I otro attikulo ni umaminasa mas este na chinatsaga i planon kontrarion Marianas giya Washington gi hechuran para umafederalisa tano`ta. Tinatitiye este nu i appruebasion ti mankombene siha na lai `nai mas ta luño` kinalamten bisnis yan industria siha guine. Gi mismo tiempo mas bahu appottunidat chochu`. Mas lokue` taya` fondu gi kahan iya Marianas.

Para todo este na mattiro, i mangaige gi timon botita ni kumapitatane hinanaota gi halom un` didog na chubasko, kulan no siakaso nu i haanen pasahero siha. Este na atetu osino mañan manma`gasta mampos dañosu.
****

Hafa na para ta sige pago rumebirensia i enemigon Marianas `nai klaro na solu planon niha i para umatulaika sustansian i Covenant Agreement `nai ta pega inañgoghota yan linala`ta? Na ti ta faisen siha hafa dipotsihe gaige gi halom planon niha? Na ti magahet na mampos man-udu `nai tana` fan manuñgo` siha na patte gi responsablidat niha i para uma-adelanta kualidat linala` natibo taimano mapluma papa` gi inakonfotman kontratan Covenant?
****

I rason na huna` fan manhahasso i offisiat publiko pago nu este siha na kuestion sa` mampos ha estotbayo` i para ta kontinua rumebirensia i kontrariuta lao klaro na taya` sentimenton niha mañaonao gi fotmat na plano pot haanen natibon Marianas. I asunto ti mapot mapula`: Si Congressman George Miller ha represesenta i mas dañkulo na industrian magago giya California yan kontodo interes US Textile Labor Unions.

Ti mañasaonao hit gi ha represesenta si Congressman Miller. Pot ayo na rason na libre ha petsige i para u luño industrian iya Marianas. Tai konsiderasion hafa para ta padese dispues de machom pettan este na industria guine. Guaha `nai manoffrese otro manera `nai siña ta sustene linala`ta yangin ha yamag i industrian iya Marianas? Ni unabes `nai hu huñgog ennao na offresimiento!

Dispues, kanaha` todo eleksion sumasaonao i inetnon hutnaleros (labor unions) manmannae` ayudon salape` guato as Congressman Miller. Naturat na debi u bailaye este na grupo kada tiempon eleksion osino uttimo chagiña mames mumembron Congresson Estados Unidos de America.

Gi hilo` este, magahet na para ta sige ha` pumasensiaye enemiguta lao dañkulo na daño esta ha sufan ginen un` fitme na pisun ekonomia? Kao para ta suñgon este na mattiro `nai gi mismo tiempo mas poduñg i ekonomian Marianas ya (esta ta tutuhon pumadese pago) mas taya` chochu` para i famaguonta? Kao este na rekueddo para tanae` famaguonta–pineble, ñalañg, gueko na esperansa, sin digno–para teñguañg niha mona? Malago`yo` hu muñgog ineppen administrasion yan kabesanten i Senate gi este siha na kuestion. Si Yuus Maase`!