Man-nahlalañg na asunto siha
Esta i kabayeros siha para gobietno sige ha guasa` espadas niha. Guaha kada rato matompu` lao sige ha` tatte. Guaha ginen matompu` lao enfin animo ha fedos ayo na hogsu` `nai sulon papa` tres años malofan. Guaha ha u`ususune komo segundo guaddian i sagua` pot para u tagam katdume.
Guaha ha` lokue` ti ha tuñgo` hafa na gaige-gue` gi halom primera kabayeros. Lao polu ya u fan achaikag pot para ta lie` haye siña gumana i tronun praimeren (primary) republican.
****
Sige man-afaisen haye mohon i metgot: Si Pepero/Kiyu osino Juan/Diego na pilea? Gi pagogo ha`, i pesadot gaige na ha u`uñgaggue` guato gi pilean Pepero/Kiyu.
Pareho i dos pilea mamaichechecho` lagse` makenarian niha. Lao maseha haye dispues para u tacho, chago` yan didog na hogsu` para u fedos gi halom tasen didog na chafleg ekonomian i tano`.
Bula taotaota man-e`echochu` pot para u guaha digno na manera `nai para u prebeniye familian niha. Konsidera i numeron applikante gi kada bakante, ennao i 40-70 na taotaota man-na`halom applikasion. Lamegai muna` fan ma-atkila lugat niha pot para u fan hanao lago Amerika `nai siña man-mañoda` siha chochu`.
Esta ti siña ha soda` ginefsagan niha guine sa` hita mismo fuma` sasalaguan i tano` paraiso. Sumen na` triste este na chinatsaga ni hita solamismo kumayon para i manatatte. Hafa uttimoña i planon sien (100) dias?
****
Todo pinetsigen asunton linahyan dinira poku tres años estake u fonhayan ennao na attikulo tat komo mahatsan eskuela, fasilidat hanom yan kandet, muchomas, ma-establesen industria yan bisnis guine gi tano`ta. Gi kada sakan lokue` `nai guaha diskuido gi checho` linahyan, tres años na ditension mafañago ya gi uttimo besis, i
publiko para u kinatga resuttan ennao na diskuido. Taya` esta kampo para ta saulag supin tase sustansiao siha na asunton linahyan.
Gi mismo tiempo, mas tana` chafleg i haanen taotaota ginen este na diskuido. Dañkulo siha na tinilaika gi makonduktan bisnis ginen i mas man-adelantao yan antao na nasion siha gi oriyata. Presiso na obligao na tatulaika i hagas pinayonta osino hayuta.
Hahasso ha` na kada sakan na ta diskuida hit, tres años tatte `nai ta pega haanen i taotao gi señgsoñg siha ni man-e`ensinahyao ayudo pot para u supotta familian niha.
Huñgan, manmafañago siha problema ginen i poduñg ekonomian Japon ni umaminasa i industrian turista guine. Umafagcha` este yan planon kontrarion Marianas para umadestrosia i inañgoghota gi papa` i Covenant ni ha petsisige si Congressman George Miller.
Lao i kuestion ni gaige gi hinasson i taotao ni man-e`ensinahyao pago na tiempo: Hafa pinetsigen miyo pot para in` tagam este siha na chinatsaga ginen planon sanhalom?
****
I kontrarion Marianas taya` hana` ya hululo` i para u fondu ayo na patte gi ekonomiata i sumustetene pago pottanmonedan osino kahan Marianas. Taya` konsiderasion hafa para ta padese kontat ke ha komple planuña. Mauleg sa` guaha manacho gi madefenden direchon iya Marianas umadelanta kinalamtenña. Lao gi mismo tiempo, mampos lokue` man-udu, bachet yan tañga i hu añgoñgogho para u defende sin ditension sustansian i inakonfotman i Covenant. Adahe na hagas buente ha tampe siha nu i sabanas mismo enemiguta? Dios miho!
