Fan maase` nu i haanen publiko

Deste dos mesis malofan, i sanpapa` na guma` ha apprueba ayo i mafananaan` “Omnibus Economic Reforms Act”. Este na proposito layeye para u pula` lamayot patte gi ginaddon siha ni fumufuñot kinalamten ekonomian Marianas pot dies (10) años na tiempo.

I lai siha ni inapprueban i manma`pos na lehislatura mampos dañosu gi ma-adelantan presente siha na industria guine. Mas ha fuñot planon para konduse nuebo siha na industria mage giya Marianas.

Gaige este na proposito gi kanai i sanhilo` na guma` lehislatura (Senate) pot dos mesis esta na tiempo. Mampos bahu i kinalamten ekonomian i tano`ta. Ti debi na u guaha finatane`.

I maditenen este na akto mas ha bohao i guafen chinatsaga gi man-ordinario na taotaota sa` mientras manlolosus i sanhilo` na guma`, mas maliñgo appottunidat nuebo na aktibidat ekonomia `nai siña mafañago mas kontribusion tax para i kahan publiko. Gi mismo tiempo, mas hasan chochu` para i megai na taotaota ni man-e`ensinahyao pago pot para u prebeniye familian niha nu nesessidat niha.

Taya` eskuso na para u maditene este na akto sa` hagas payon i sanhilo` na guma` man-apprueba proposito siha sin inekuñgog publiko.
Klaro na tai konsiderasion gi hagas manañga na fina` ayudo ni komunidat bisnis pot para u siña kalamten. Sin pattisipasion i komunidat bisnis, añgogho na mafondu galaide` Marianas gi uttimon pago na sakan.

Dispues, yangin makat osino mapot i sanhilo` na guma` ha komprende hafa sesso pinadesen i taotao siha ni ha represesenta, pues dañkulo na dinage gi publiko pot para u adelanta haanen i mayoria ni man-e`enañga ayudo ginen i man-ma`gas niha. Señores, pot fabot kemprende na obligasion miyo umadelanta linala` natibo.
Yangin para in` fan gando huegon imbidio, pues añgogho na i publiko siempre u famatinas disision sin ditension gi mamamaila` na eleksion.
****

Diberas, siempre talie` amano dinidogña i chafleg ekonomian Marianas espesiatmente gi uttimon este na sakan.

Yangin esta i komunidat bisnis dumidimo ya man-gagagao ausilio na u guaha dididi` konsiderasion (piot pago `nai mas baba i kinalamten niha) ya taya` listo na sensian kabayero ginen i sanhilo` na guma`, pues aregla hamyo afañielos ya ta fan matcha hulo` gi offisinan niha.

Tatnai sisida para ta a`atan diaramente membron familia sin chochu`, sin kabales yan digno na manera `nai siña ha prebeniye familian niha, yan didog na linala` miserable sa` mandiskuidao i mansabio gi hegso` i Deni`.
Ti este guinifen i publiko `nai man-inentrega hamyo nu i konfiansan niha gi mapos na eleksion. Listo na sensian kabayero ha ekspepekta ginen i man-ma`gas niha.

Mampos sumen na` triste i sensian imbidio ni oppan dimasiao ginen i sanhilo` na guma`. Ti hoñgiyon na manbachet, tañga yan udu i membron i Senate gi un` asunton linahyan `nai siña mana` guaha alibio para i mayoria ni pumadedese diskuidon kustumbren imbidio yan fina`tane`. Dios miho fan maase` nu i diario na chinatsaga gi taotao siha ni hamyo mismo umatisa pot diskuidon miyo.