Pot `nos kuantos asunto siha
Guine gi mapos na semana, guaha kuatro na taotao giya Canada manpinino` nu bakterian mafananaan` E. Coli. Era, guaha diskuido gi kompanian hanom `nai fumatso i makina ni lumalagnos i chlorine pot para u puno` este na bakteria.
Gi mismo tiempo manlalagnos notisia i ahensian DEQ guiine pot masoda` dos klasen baketerian E.Coli gi tasen Garapan siha. Este na bakteria ginen take` galago yan taotao ni mankinilili` guato gi halom tase dispues de duron uchan.
Pot fabot atetuye este na notisia pot hinemlo` miyo mismo. Muñga na estake guaha matai osino tinatme serioso na chetnot ginen E. Coli `nai para ta espipiha remedio. Pago i tiempon inadahe. Suhaye este siha na lugat yangin para in` keni` familian miyo manpicnic.
****
I uson mandañosu siha na attifision peska deste tiempo gi tasen Obyan mona esta iya San Antonio, Chalan Piao esta Susupe ha puno` sagan fañochuyan guihan guine siha na tase. Megai na koraling manpinino` ginen uson deris.
Huñgan, libiano na klasen peska uson deris osino clorox. Lao gi mismo tiempo ta pupuno` i koraliñg siha `nai man-nanahgoñg guihan sanhalom pot neñkano` yan `an tiempon mañada`.
I para u na`lo tatte i koraliñg tinaka` esta dies años na tiempo. `Nai masusede este, taya` lugat niha i guihan sanhalom `nai siña ha muttiplika siha. Gi uttimo besis, hokog siempre este na mina ni hagas ta apprubebecha deste antes. Pot fabot, maila` ta fan hita prumotehe i hihikog na minan halom tasita siha.
****
I otro mina ni hihikog i hanom ni ginen i tipu` siha guine. Mauleg ta komprende na dikiki` tano`ta siha ya pot este na rason na mandikiki` lokue` i matan tupu` gi maseha mano. Ni kuanto na bomba `nai esta hokog hanom, guseña na oda` binemba hulo` dispues kimason i bomba.
Ayo na hinasso i para ta pega mas bomba gi mismo lugat tat seguro na u guaha mas hanom.
Yangin guaha dinidamo, pues chule` un` siñko galon na batde ya unna` bula hanom. Dispues, chule` un` tilipas ya un` chopchup huyoñg todo i hanom guennao na batde.
Pega maseha tres talo na tilipas hanom ya un bomba huyoñg. Yangin guaha sineda`mo hanom, pot fabot a`agañgyo` maseha pot para bai` ketuñgo` hafa nuebo na atte sineda`mo ni tatnai talie` antes.
****
Antes, i kemon natibo gaige gi sanhiyoñg. Taya` uson hanom sa` maguaduke fina` hoyu, dispues mafa` gumae` para uson familia. Matulaika esta i modun komon gi memegaiña na guma` siha. Kanaha` todos mangai komon sanhalom. Taya` para un` chogue soluke para un` atileg i talañga gi me`nan i tañke.
Manmalelefa hit na este na modun komon bula na hanom ha nesessita.
Seguroyo` na un` dia siempre u guaha sineda` uson hanom tase para komon sanhalom siha. Lao estake u fatto ennao na tiempo, pot fabot usa mauleg i hihikog na minan hanom.
****
Megai na taotao fumafaisenyo` kao ñgaian na tiempo `nai siña i hospitatta guine man-emplea spesialistan korason, riñihon yan otro siha na spesialista.
I asunto pot inadahe gi hinemlo` kada uno. Ti bale emplea spesialistan korason `nai duro hit ta daflogue mantika, asiga, chupa yan maneska.
‘Nai hago mismo yumamag gigat korasonmo osino i ligan ennao na patte gi tataotaomo, ni un` makonie` spesialista ginen Uropa siempre madeklara sin ditension na sala` i kaosamo. Uniko remedio i para u matulaika korasonmo.
Guaguan i gaston nuebo na korason. Maulegña un` nañga ma`agañgmo ke un` sapet linala` familiamo pot diskuidumo. I haanimo, hago mismo rumesponsasable. Na metgot hao gi manhomlo` siha na eksision hinemlo`. Si Yuus Maase`!
