Tratamienton estrañghero

Megai `nai chumaleg maisayo` `an hu konsidera i atetun (mañan) hipokrito gi membron sanhilo` na guma` (Senate) pot bandan kontribusion tax ginen industrian magago guine.

I relasion kulan mohon un` kasamiento `nai esta matai i guafen guinaiya
ya matutuhon mattratan i fiet na nanan guma`. Yata i prohima sa` mauleg na nanan famaguon yan fiet. Lao, gi mismo tiempo duro hit man-nañgo gi checho` konkabido.

Ai, dios miho, yan niha i salape` industrian magago lao ni unabes `nai talie` guaha satton na kinemite para uma`ayuda este na industria. Ti manmalago` makomprende na solu este na haligen ekonomian tano`ta i sumustene kahan Marianas deste kuatro años malofan `nai poduñg i industrian turista.

Kulan peskadot gi tadoñg na tase ni tumutufoñg i guihan gi hiyoñg bote komo seguro na kineni`. Malefa ti ha tufoñg i seguro kineni` ni gaige gi halom botiña. Ayo ha tutufoñg i man-nanañgo chago` gi tatten bote. Dios miho, haf` ti u bulalacho i asunton linahyan siha.
****

Mampos dañosu i atetun i sanhilo` na guma` yan i hagas kabesanten sanpapa` na guma` deste dose (12) años malofan.
Ma-estira i atetun muron kontra asunton publiko gi bandan ekonomia
kulan mohon sosobla Marianas salape` gi kahan publiko. Ti makomprende hafa i para umasusede gi ayo siha na lehislasion i ma-apprueba ni lumuño` mas i chafleg na kinalamten ekonomiata guine.

Diberas, mampos bula Santo Tomas `nai hafa` bachet siha gi dicho asunton linala` i man-otdinario ni man-e`ensinahyao gi señgsoñg siha para u prebeniye familian niha.

I punto: Manmalefa hafa i primera rason na manma-elihe siha para i offisinan publiko gi kuetpon lehislatura.
****

Komprendiyon i checho` muron siha gi Senate sa` madibide i sindalon Pepero`-Kiyu kontra Juan-Diego.

Un` tontu pumetsige un` atetu `nai ha tagam man-antao siha na proposito ginen i sanpapa` na guma` pot guiya uno gi sumupopotta i tropan Juan-Diego.
Malefa este na muron nu i primera rason hafa na gaigegue` guihe na puesto. Esta nina` bachet yan tañga nu i politikan sumen na`tata. Ti bonito ta sañgan sa` sage`, lao diberas magahet.

Siempre u fatto ayo na tiempo `nai debi ta apase tatte este siha na checho` muron yan didog na finatso kontra interes i publiko. Ti u mahñao esta este na kurenten sentimento ginen i publiko.
****

Esta namatman i malilie` mahuchom mas ke dos mit (2,000) na bisnis siha guine deste kuatro años malofan komo seriosu na señat na baba mampos i kinalamten ekonomian iya Marianas.

Dimas mohon de u atisa sensian aplacha` na politika ya u guaha dinaña man-antao na kabayeros, mañeha sin ditension ya mangando nu i linala` i man-inosiente na publiko ni pumadedese pago didog na chinatsaga.

Kao este uttimo na rekueddo para i taotao ni munae` hamyo konfiansa sa` ilegmiyo na hamyo i mansabio yan listo gi checho` linahyan? Ti umaya hafa fino` miyo yan chatchecho` miyo siha pot dose (12) años na tiempo.

Yangin pago para un` areregla i fatsu na mañamo gi manlache yan dañosu siha na checho` muron, mampos esta atrasao para un` funas i hinasson publiko ni un` sasapet pago pot natata na huegon politika. Solu guaha tumunog milagro, lao hombre ennao inipos suspechosu.