Taya` esta kampo para diskuido

Matto dicho i tiempo `nai obligao hinisgan hafa malago`ta para futuron famaguonta. Hombre si nana yan tata, mangeftao pumulan yan umesgaihon hit mona deste haanen manmafañaguta. Gi hilo` todo mattiro, esta ha mamattit siha pot para uma`asegura na ta soda` futtunata.

Kumeke ilegña este na i hagas hayuta (pinayonta), debi ta tulaika gi hilo` sakrifisio pot para u siña ta konduse satton i man-maug` siha na areglo. Makat na pinetsige, lao sumen presiso `an para ta kayon yano na plaset yan linala` famaguon natibo. Taya` esta kampo para diskuidon natata na konsiderasion areglon linahyan.

I punto: Kulan guiya este i estorian i edut yan apacha`. Animo i edut manrikohe mantension para `an matto i tiempon maneñgheñg. Tinane` i apacha` gumupot, de hemunos de preparasion. `Nai matto i tiempon maneñgheñg, matai i apacha` sa` taya` mantensionña.
****

Mampos hana` chatsagayo` i machoneg gi un` banda i mas man-sustansiao siha na asunton linahyan. Fuera de ha luño` hit i poduñg ekonomian iya Asia, tinatiye nu i propositon para mafederalisa areglon iya Marianas, dispues tatatte i manlache siha na areglo ginen hita mismo.

Esta namatman `an ta konsidera kao magahet na i Senate yan i alacha na kabesanten sanapapa` na guma ti mataitai ripot siha guine na gaseta pot mahuchom mas ke 50 pot siento na binis siha deste kuatro años malofan.

Diberas, manbatbaro ma-upos sustansiao na asunto siha pot natata na huegon politika. Ke lao haye in` represesenta: I pattidan republican pat i publiko?

Dispues, i representanten Marianas giya Washington as Juan N. Babauta ni guiya mismo ti ha tuñgo` na guaha un` lehislasion maseñala para u puno` enteramiente i ekonomian Marianas. Tinane` mangupot gi fina` baranda yan i delegasion Senate Marianas. Ni uno tumuñgo` hafa estaoña ayo na lehislasion i para u destrosia futuron tano`ta gigon mapasa nu i Congresson America.
****

Gigon lache este na kodu (ya kanaha` seguro na makonsidera i mapropopone na lehislasion kontra Marianas), baiho fofona` hulo` i plasan batkon aire gi hilo` makat na sentimento sa` madestrosdia direchon natibo gomubietnan maisague`.

Mantinane` i man-ma`gasta man-afatane` kulan mohon hita solu famaguon Yuus. Fino` un` amiguho, gi alacha `nai bumakasion-gue` gi lañget ha lie` un` tablon yan felis na mensahe para i natibon este siha na islas. Gi biradaña, mana` suha i tablon Marianas. Gaige na mapega pago gi un` offisina gi kanton lugat Lucifet. Dios miho!
****

I tiempo ni uno gumuguot` gi dos patman kanaiña. Pot este na rason na presiso yan obligao na hita mismo ta uma kiluosta gi hilo` sakrifisio pot para ta gosa mas maug` na kinisechan masahalomta sa` hita mismo fumachuchue`

Taya` esta kampo para mahasñgon siha na diskuido ni mamatmos gi tasen imbidio osino na`tata na politika. Tanto de manmama` sabion kariso i manmatatachoñg pago, ta fafana` un` prinipone gi menan Congresson Estados Unidos de America ni para u destrosia haanen natibo gi masdañosu na manera. Kao este rekueddon miyo para i famaguon Marianas? Si Yuus Maase`!