Dinanche mapetsisige

Pareho ha` i Public School System yan NMC, esta matutuhon pinetsigen para uma-establese uson i mafananaan` Information Technology (modetno na sistema komunikasion) ni mau`usa pago gi mas man-atbansao na nasion.

Deste bisnis gi entalo` nasion, edukasion, hinemlo` yan otro siha kinalamten, i para u antao kinalamtenña solu i umabiba halom i uson benefision Infortmation Technology. I dumisidi maigo` ñaihon, siempre ayo ha` bisioña i umenañga giya tatatte gi fila.

Hana` maagim siñientegho i menhalom na manma`gasta gi bandan edukasion. Makomprende sustansianña i benefision Information Technology ya pareho machule` propio aksion sin u fan manñañga manpaosa na membron i Senate yan administrasion.

Hu saluluda i kabesanten PSS yan NMC pot prontu mapetsige hafa i mas propio pot para umakonduse halom i nuebo na ramientan entero man-atbansao na nasion. Klaro na ti u fan ñgaha` hulo` gi lañget i famaguonta sa` matutuhon esta preparasion sumen presiso na attikulo gi futturon niha.
****

I mangaige gi bandan edukasion, todo i tiempo mas man-maug` gi todo pinetsigen minauleg i manatatte.

Man-matachoñg diaramiente ya maplanea hafa leksion i sigiente dia. Ayo na patte `nai malie` na guaha dididi` chinatsaga, matalon maripasa ya makorihe ensegidas.

Este na eksisio i manplanea, sumen presiso para maseha mano na offisinan publiko. Achogha` i lehislatura, debi i dos guma` u listo umanae` gi konsiderasion akto siha ni manmaseñala para benefision publiko.

Mientras listo yan satton i sanpapa` na guma`, inipos paosa i Senate gi checho` ininan asunton linahyan. Rason? Ti payon ha planea dibuenamiente i konsiderasion akto siha ni matto gi menan niha.

Mafa` bisiu mapasa primet yan uttimo tinaitai megai na lehislasion siha. `Nai matto gi sustansiao siha na asunto, manmama` i sabio sa` pago presisiso na u guaha nina` halom publiko.

Kulan mohon i hagas ha chochogue i checho` niha. Lao hagas tuñguon` na sesso manlosus taloane piot gi dispues de paire na katdon tolañg osino pattas guaka. Dios miho!
****

Yangin hagas losus hao, pues klaro na ti sesso un` rikonose hafa sentimienton i publiko gi señgsoñg siha.

`Nai mayahon` sisitan hao gi oran la una gi taloane, lalalo` hao sa` ma-estotba i mañge` na rinikohen mugo` taloane.

Taimano un` dageyo` na hu huhuñgog ha` losusmo deste pettan iya lagogu na offisian sanpapa` na guma`?

Hombre, kahulo` ya un` estira hao kadu` hagas hao lumalaoya gi halom offisinan i Senate. Pues tulos para i kemon ya un` fagase matamo pot no un kinehaye na ginen manrikohe hao mugo`.
****

Ti siña na un` sige ha` dumage i publiko pot checho`mo para siempre. Ya para hafa tana` chago: Rikonose talo un` biahe hafa estao linala` niha pago na ora. Chamo` mamatman yangin mablañko hao nu i taisinahguan na satten hinegsa`. Taiguine chiña bahun linala` megai na taotao ni in` fatañgaye deste sais años malofan, di ba? Hamyo umatisa yan umabiba i didog na chinatsagan publiko piot guine giya Saipan. Para ta fanai guiguine ha`? Dios miho!