Estrakadan politikan Isla
`Nai hu bisita iya Luta yan Tinian guine gi alacha, sige hu pesa haye na grupo tatagfe`na gi entalo` Pepero-Kiyu yan Babauta-Benavente. Todo atmos banda gai disbintaha piot gi dos dikiki` na islas.
Si Pepero` layeye pot asunton keha gi kotte pot bandan representasion gi lehislatura. Lao mapla` ginen este na asunto sa` ha konfitma i kotte intension i Covenant Agreement. Mauleg kinalamtetenña giya Tinian. Metgot lokue` giya Luta sa` iniluluye grupuña nu i mayot.
I grupon Babauta-Benavente kulan mau`udai gi amaka, kada machukan hulo`, papa`, dispues basnag. Oppan gi dos islas (Luta yan Tinian) na guiya este na tropa i kumokontra ginagao ayudon salape` para i dos islas gi Congresson Estados Unidos de America.
Deste tutuhon lache i guaha dos pilea gi halom pattidan Republican. Para todo i aguot kanai, makat mana` fañgontento i dimalas na tropa.
Tutuhon mafag plato `nai hagas sumentada i dos grupo. I inachachag maseha silensio, lao didog na kurenten inadisgusto gi entalo` i dos tropa. Ti namatman yangin gi uttimo besis magpo` este inadisgusto gi fino` kuentos: One Pay De Odda.
Metgot si Pepero` sa` gaige kakatnen botu gi empleao gobietno pago. Fuera ha` de parentela, megai para u dinalag gi oran botasion praimere (primary) gi Nobiembre dia 4. Guaha ha` man-mappa, lao memegaiña mañaga yan si Pepero`.
Pot mina` tres besis si Señor Juan N. Babauta ha dagao halom tihoñgña gi ridondun politikan Republican para i primet puesto. Gi todo i dos biahe gi manmapos siha na praimere, dimalas. Malalagnos pago fina kuentos na siña ha` malago komo Independent yangin dimalas gi uttimo suspiros un` puesto ni hagas ha petsige. Ha fafana` un` diniseha ni mampos hihot, lao sumen chago` gi mismo tiempo.
I haguan kalentura gi todo atmos bandan plaset Republican hihot mahlog. I para u tacho gi uttimo sakudida komo offisiat na kandidaton gobietno para i pattidan Republican solu i hagas man-dismonta, alado, rumega, yan tumanom i paire na simiya. I para u kusecha dispues tinanomña, ennao otro asunto sa` siempre u fagchae` primet pagyon este
na siglu gi estrakadan politikan man-dikiki` na islas siha.
****
Ilegña i fino` man-amko` “Guaha na finachucho`ta ti para hita”. Hu komprende signifikasionña este na fino` niha. Hu aksepta todo disposision ginen hilo`. Hafa i para guaho, sumen magofyo` rumisibe.
Maseha kanaha` hu puno`yo` fumachuchue` un` attikulo ya ti matto giya guaho, listoyo` rumisibe madisponiho. Guiya este i mafananaan` pinasensia. Sige hu atetuye hafa sustansiaña yan benefisioña este i sensian pinasensia. Kada hu birayo` para bai` faisen i sumañgane-yo` pot ineyag pinasensia, taigue gi tattegho. Sigeyo` mona gi kareraho.
Dispues umasoda ham ya hu ñañgon na diberas makat este i ineyag pumasensia. Chumaleg tuyan `nai sige hu kobla. Paire este na maestrogho!
