Kliman Japon yan Asia

Namagof ta huñgog i dos pilean kandidaton pattidan Republican para gobietno mamente na edukasion yan ekonomia para umapetsige yangin siha gumuot` i konfiansan botadot gi praimere (primary) ni maseñala para Nobiembre dia 4.

Yahu lumie` hafa este na plano rason na sesso–deste mapos na eleksion–hu huñgog pot planon este, ayo yan todo klasen plano ni ti matirialisa. Siña ti in` heñge, lao si Mayor Francisco Borja solu hu tuñgo` gai plano antes de u halom guihe na puesto. Dispues, ha implementa sin ditension gi hilo` estudiao na asunton linahyan para u adelanta linala` taotao iya Tinian.

Chatmiyo nina` fan fofontun, lao si Mayor Borja solu hulie` kabales na kapitan gi hilo` batkoña. Los dimas, memegaiña yumute` tiempon niha man-esalao man-gueko siha na promesa.
Komprende pot fabot na ti kattan “Poppy Love” osino e-mail dicho plano pot asunton linahyan. Lao, aksepta na dididi` atrasao ennao i in` planenea pago.

I publiko ti inosiente sa` hagas ha lagnos ennao siha na plano si Speaker Benigno R. Fitial. Lao buente i los pobres pago manmanmamata ginen i mañge` na losus taloane ya masoda` na ti baba yangin mafa` planon niha mismo i linagnos Speaker Fitiial deste Enero na mes pago na sakan. Dios miho!
****

Guine gi mapos na semana, linao iya Taiwan `nai megai daño tat komo mayamag chalan yan lugat bisnis siha.

Iya Taiwan mau`udai gi hilo` dos na acho` ni sesso kalamten. Guiya este na acho` `nai umasoda` iya Asia yan Pasifiko miyos pot miyas gi papa` tano`.

Japon mas didog problemaña guine na asunto sa` kuatro na acho` `nai mau`udai. Ti namatman yangin un` dia gi ti apmam yan pago mayamag i siudan iya Tokyo pot linao. Ti ta diseseha na u fatto este na ira. Lao mauleg ta prepara hit para siakaso na masusede.

I industrian turista siempre mas poduñg siakaso na dinestrosia Tokyo yan siuda siha gi oriya nu i dañkulo na linao. Makatkukula na miyon para u fan matai yan iridao ginen i hagas manañga na ira.

Gi este na punto, mauleg i manma`gasta u tutuhon fina` plano espesiatmente gi bandan industrian turista. I punto: Debi u guaha segundo plano hafa na industria siña kumatso yangin u poduñg mas i industrian turista.

Hombre pago, megai na bisnis (mas ke 2000) humuchom pettan niha pot baban ekonomia. Kaudo menos ya u fatto este na ira giya Japon.
Mas megai para u fan inaminasa operasion bisnis niha piot ayo i mangaige gi bisnis turista.
****

Si Speaker Fitial ilegña na ha sen-agradese i primet biahe `nai i Washington Rep. as Juan N. Babauta ha supotta mana` suhan iya Marianas ginen priniponen lai pot federal minimum wage.

Dispues de ennao, guaha mahuñgog gi fina` katsada kumakanta “Haye mamaigo`, chelumo si Juan, chulumo si Juan…mandandan i kampana….” Fakto na gi alacha, si Señor Babauta ha supotta un` akto `nai para umana` halom Marianas gi un` ginagao pot federal minimum wage.

Pago ha komprerende i prohimo na siempre u linao yan mayamag ekonomian iya Marianas gigon umapplikable i federal minimum wage guine. Lao ta diseseha na i asunton politika tatrata komo temporario ya ta abiba i hagas mauleg siha na amesta maseha haye u fangana, tabla osino dimalas.