`Nai ma`pos i patriatkan familia
`Nai dumadañkulo-yo`, sesso i mañainaho siha man-daña `an Dameñgo osino fina` gupot gi as nana yan tata. Manñge` na dinaña `nai i grasian antes siha sige man-masañgan. Tat ti chumachaleg `an sige i estorian antes siha. Kontodo guaho chumachaleg yan magof siñientegho.
Sige mona i tiempo, man-maagañg para i deskanson niha i dos amko`. Mumaliñgo ayo na dinaña `an uttimon semana ya dispues kada uno konsu dinana`ña. Taigue esta i patriatkan familia ni gumuguot` gi hilo` fitme na pogse` i inetnon familia. Kalan hana` chatsaga-yo` i masusede lao buente naturat gi hinanao kada familia.
Mina` hu mente este na asunto pot siniseden ayo siha na mañelo i sesso man-adisgusto gi halom siha ha` ti man-hihot relasion niha gi dispues `nai humanao i patriatkan familia. I man-afamauleg man-arikohe, i otro tropa ha chule` lokue` chalan niha. Gi hinasogho, ti debi mohon este na umasusede gi entalo` mañelo.
Lao gi karera mona, bula kompitensian tane` osino guaha un` asunto kumahulo` `nai ha chalapon i hagas man-agoflie` na membron familia. Uno, pot patten tano` piot `nai sumasaonao dibision salape`. Mafañago un` inadisgusto `nai solu man-mirise megai gi madibiden fiñkas familia i abugao. Ai, tana` riko i abugao ya hita ni membron familia rumikohe i poñgpuñg soblan abugao.
Buete ti presiso na taiguine umasusede yangin deste tutuhon guaha himidde gi hafa disposision i dos saina. Yangin taya` nu ennao na areglo, pues u ma-establese inakomprende `nai todos u fan mapatte pareho. Magahet na mampos ha estrañayo` i megai na kaosan familia guine `nai man-afana` komo kontrario gi halom kotte. Dudayo` kao este finana`guen nana yan tata. Lokue`, `nai guaha didog na inadisgusto, hita mismo dumis-onra i dos sainata, un` sumen na`mamahlao na sinisede.
Fan arikohe ya in` limienda tatte gi hagas manñge` na amesta sa` gi uttimo besis, piot `nai ha fagchae` hit un` gotpe, taya` para u gaige soluke i mismo familiamo. Tai bali i lagu` pinite sa` un` sedi na u hanao i chetlumo sin in` afamauleg tatte. Dispues, uno gi mas metgot na attikulo gi familian natibo i dinaña` gi maseha hafa na okasion. Planuye este na asunto para i mamamaila` na haanen gupot siha. Si Yuus Maase`!
• • • • •
Mampos lokue` ha estotbayo` i diskuidon disisison politika `nai ta sede hasupag na disision para u dibidi i hagas manhihot na familia siha. Gi hilo` este, ta guot` kontra i prohimuta (piot kontra sainata) un` sinisede `nai hita mismo ti rumipara hafa sustansian disisionta petsonatmente.
Mafañago minalaet` sa` ta ekspepekta supottasion ginen siha, lao hita mismo dumiskuida hit sa` tita repara i estao `nai man-gaige i mañainata osino hihot na parentela.
Ni sikiera ta toma padiset i amko` kao mauleg ha` hafa ta planunuye yan kao propio na ta konsige hafa planuta. Sin konsuttasion, ta atrebi hit gi hilo` un` disision `nai dispues sige pago i familia man-akuestiona hafa na taiguine masusede.
Ti bonito este na finapos sa` pot apmam na tiempo guaha dispues minasa` gi entalo` todos lao hagas este siha na familia man-hihot giya siha mismo. Na` pinite lao ta sede pot diskuido. Man-hasupag hit pumañot un` mahetog na pidason neñkano` sin ta ñgañgas pot para tana` mamtu`. Hu diseseha na u guaha dispues linimienda familia para i man-ginacha` indukto pot diskuido. Si Yuus Maase`!
Strictly a personal view. John S. DelRosario Jr. is publisher of Saipan Tribune.
