Tradision Haanen Thanksgiving!

I Haanen Thanksgiving hagas patte gi tradision natibo pot dididi` difirensiao gi manera `nai maselelebra giya America yan Marianas.

I sustansian este na haane pareho–maseñala komo haanen mannaen` agradesimiento gi Nanalibreta–pot todo i grasia yan bendision ni matto ginen hilo` pago na sakan.

Komprendiyon na guaha lokue` man-chatsaga, lao ti matto chiña guihe na eskalera `nai esta man-e`egagao sinparat para kinano` niha. Megai besis, ginen kustumbreta, `nai man-akubre hit uno yan otro gi oran nesessidat. Taya` trabiha `nai hulie` natibo mama` esklabo para u kesoda` kinano`ña.

I tradision mannae` agradesimiento tinituhon mañainata deste antigo na tiempo. Mas masimiento este komo tradision dispues de hinalom Españot. Hita mismo kumatga komo tradision pot hineñgeta gi Saina taimano `nai ha lulog hit si nana yan tata. Ginen este na koyentura `nai manmafana`gue hit hafa sustansiaña inagoflie` yan ameseta gi entalo` natibo.

Sumen na`magof lokue` talilie` gi famaguonta dinaña Thanksgiving Day un` dia antes de dicho haaniña. Kada patgon tat komo i lahiho matarea un` putahe pot para u fañiha man-amotsa yan man-ga`choñg niha yan maestra nigap na haane. Antes de este na amotsa, esta monhayan madiskute signifikasion Thanksgiving Day.

Pago lokue` na haane `nai matutuhon i Haanen Gupot (Christmas) siha guine gi tano`ta. Maseha guaha chinatsagata kada uno, hu lie` na ni uno sumeha `nai matto ginagao para supottasion Gima` Yuos`ta siha deste Saipan, Luta yan Tinian.

• • • •

Pot Chaleg: Este na haane hana` hahassoyo` guihe na tiempo `nai trabiha eskuelanteyo` primera yan segundo grado.

Diberas, ti hu tuñgo` hafa pabu lao sesso in` yiñga` yan man-gachoñgho gi un` papet antes de haanen `nai maselelebra Thanksgiving.

Man-aya yan i maestra, tatnai fatta i mana` kahulo` i patgon gi san-mena para u sañgan hafa na`ña gi paiñge (Thanksgiving Day).

Tat ti hu huñgog sumañgan na chumochu-gue` pabu yan pain` (pie) kalamasa. Ai de dios, puru fino` kadu` sa` kanaha` todos mañochu saddinas sa` mampos poble i tano`.

Ni ti hu tuñgo` hafa pabu lao hu lachai kumano` gi hilo` papet `nai hu yuñga` ennao na chatpagon gaga`. Gi magahet ti manmandage ham sa` tiha tuñgo` i maestran mame na siña un` kano hinetnon pabu gi hinassomo osino guinifimo.

Lao dispensayon sa` trabiha guihe na tiempo pago ha` ta tutuhon umadopta este na tradision i Thanksgiving Day. Bueno, Felis na Haanen Thanksgiving para todos. Mit grasias gi Saina pot todo i bendisioña giya hita.

• • • •

Uno gi mas na`magof pot este na haane i dinaña` familia. Abiba este na tradision sa` mauleg para i taotao siha. Si Yuus Maase` yan ghilisow! Happy Thanksgiving Day!

Strictly a personal view. John S. DelRosario Jr. is publisher of Saipan Tribune.