Previous Story
Lumala`tatte amot bineno
|
Posted on Dec 05 2000
I Asunto: Lumala` tatte i amot bineno (Shabu osino “Ice”) gi katkuet eskalera guine gi tano`ta.
Opiñion: Obligao na ta ataha este na problema osino megai familia para u fan nina` daño.
Gi mapos na semana, man-lagnos infotmasion i sekretarian hinemlo` na mas ma-umenta i uson ais (“ice”) osino shabu guine giya Marianas.
Entre ma-impotta osino mafabrika este na bineno guine gi fina` fanliheñg i bumebende este na attikulo.
Mas obra mabende, piot gi man-hoben siha na famaguonta yan lokue` man-disente na familia. Mampos dañkulo na chinatsaga para u fañago este na problema gi entalo` familiata siha guine.
Chatpago i ginen man-masusede siha espesiatmente `nai uno osino todo i dos saina umu`usa este na amot diaramente. Machalapon i familia sa` ni tampoko i dos saina mayute` ñaihon dicho obligasion saina sa` mas mana` presiso uson amot shabu.
Gi este na karera, mayamag i mabendise na matrimoñio ya gi mismo tiempo madisgrana i hagas fitme na familian kilisyano. Kada saina ha apattague` ginen obligasionña. I famaguon taya` para u fan krineansa osino inattende gi diario na nesessidat niha. Mas i famaguon manmapega gi piligrosu na chalan kantit. Ni uno gi dos saina gaige para u pipet siha mona gi idat na pago man-e`eyag mantaotao.
I uson amot fuetsao ha obliga i nanan guma` na u benden maisague` pot para u famahan shabu. Mampos sumen na`triste `nai matto este na asunto guine na eskalera. Ha yute` ñaihon i onroña pot para u famahan amot sa` inadite nu i fottilisan ais.
Guaha ha` na famaguon man-suette sa` ti man-inaminasa seriosamiente nu i madisgranan familiaña. Lao memegaiña nina` fan bulacho yan fatigao `nai man-tinetpe nu este na chinatsaga. Ta diseseha na ti u a`det mas i mabende yan uson ais guine. Gi mismo tiempo, siña hao man-ayuda gi maripot hafa na sinisede ni ti kombene pot este na asunto.
Fanacho pot para ta protehe futuron famaguonta yan fitme na dinaña familia sa` estegue` i tradision natibo deste antigo na tiempo. Si Yuss Maase` yan ghilisow!
