Previous Story
Gueko na offresimiento
|
Posted on Dec 07 2000
I Asunto: Ineffrese pot subrida gi halom un` didog na chinatsaga sa` taya` fondu gi kahan Marianas.
Opiñion: Lache i para ta fafatta banida gi halom un` sumen chafleg na ekonomia guine giya Marianas.
Yangin nahoñg fondu gi kahan Marianas gi todo i mas man-presiso na nesessidat publiko, mauleg u guaha konsiderasion gi mapropopone na subrida.
Lao `nai dañkulo dibin Marianas tat komo bandan health insurance–ennao i $4 miyon pesos–`nai kontodo man-malañguta man-machanda setbisio pot este na dibi, debi ta bira hit tatte humusga kao ti lache na tuhoñg ta u`usda man-mañaluda.
Matto gi man-tramposu hit manman-offrese subrida `nai gueko i fondun Marianas. Piot sa` kontodo programan scholarship ma-utot pot taya` fondu gi kahan publiko. Pago para ta atrebi hit subrida `nai ta sakrifisia interes mayotmente gi publiko?
I empleao gobietno siha, medio ennao i $9 tantos gi ora magagana. Pago i empleao praibet poko mas o`menos, $6 tantos gi ora. `Nai guaha difirensia gi sueddo, hafa na para mas ta luño` haanen i mangaige gi praibet na patte gi komunidan Marianas? Hafa na para i empleao praibet para u mana` fan apase mas ginen kontribusion tax pot para umanalala` i mas mantai produkto na empleao gobietno?
Este na ginagao bision muron gi tiempon estrakadan politika `nai mapuge` talo i botadot gi hilo` gueko na offresimiento. Dañkulo na finababa gi publiko piot sa` tat titumuñgo` na mampos chafleg i ekonomian Marianas pago.
Trabiha i ekonomian Marianas kaiha para u nalo tatte gi homlu` na estao. Tinaka` talo dies años estake para u guaha sustansiao na adelanto guine gi bandan ekonomia. Pot este na rason na ti propio para ta banidosusuye un` asunto na lamita manmasakrifisia sin presiso ya i otro lamita mangugupot.
Makat i kinalamten pago na tiempo ya pot este na rason na debi u guaha satton na inadahe gi todo sientimos ni gaige pago gi halom kahan Marianas. Si Yuus Maase` yan ghilisow!
