Pot `nos kuantos attikulo siha

Ume`esalao `nos kuantos membron lehislatura pot subridan sueddo. Guiya este i kustumbren tiempon eleksion Yangin mas ke $3 pesos hagagana i empleao gobietno ke ayo siha i mangaige gi praibet, justisiao na i esta ha` tatkilo` sueddon niha para un` hatsa mas ginen i kalaguag niha?

Dispues, mangaige hit pago gi talulo` gi tiempon eskases. Ni gaston medical referral ti siña ta apase ya para in` fan sige ha` muna` fan man-añgogho i empleao pot subrida? Dañkulo mampos i dibin gobietno na guaha esta pago (pot tres años na tiempo) ti ma`apapase nu i setbisioña ya para ta sige ha` man-esalao pot subrida?

Ta chanda i programan scholarship gi ayo siha na tataotao i man-eskuekuela gi NMC. Lastima i animon niha umadelanta siha pot offisio ya hista mismo chumanda appottunidat niha. Ennao na modun agradesimiento i ta puno` appottunidat niha ya gi mismo tiempo sige ta ke hatsa i sueddo ginen un` gueko na pottamonedan Marianas?

Trabiha ti mafatto gi fondu i poduñg ekonomiata, señores yan señoras. Estake para u yeñgyoñg attensionta este na asunto, nae tiempo esta i otro sakan `nai siempre guaha gi entre hita fumila gi kanton Beach Road man-bende dadig yan `an usan lapes. Gi mapot na fino` Chamorro, ilegña i man-amlo` “Muñga mañaluda ni ti tihoñgmo”. Ebalua hafa sustansiaña este ya in` pesa kontra i gueko na fino` miyo pot subrida.

• • • • •

Huñgan todo mumirese subrida yangin enfin metgot pago na tiempo i pisun ekonomia. Lao `nai sige umabarambao, maulegña tafan mannae` mit magrasias na megai gi entre hita, masehe dididi` chatsaga, guaha pudet para ta prrebeniye nesessidat familiata.

I pago monhahayan mafitma na lai pot investors, tinaka` esta tres años para talie` manma-establesen niha guine. Nae` dies (10) años antes de talie` kao mauleg kinalamteña komo uno gi makenarian ekonomian tano`ta. Muñga na deste pago para ta botsa todo siempre u felis kareran i man-nuebo siha na bisnis.

Para todo i man-sañgan, trabiha Japon tiha fatotoigue ayo na eskalera `nai siña ha sañgan na huñgan esta areglao pisun ekonomiaña. Estake guaha satton na mensahe pot este na asunto, iya Marianas debi diaramiento u guaddia todo sientimos gi halom kahaña. Taya` kampo para tafan lache gi uttimo disposision kontribusion empleao siha gi todo atmos banda.

• • • • •

Pot chaleg: Gi un` kompleaños matai, mamaisen un` amiguho kao para u guaha fina` finatinas. Lao ni un` biahe `nai hulie` gi misa si pindeho. Ilegho na i lateria si dude ha rikononose. Mmmm! Maliñgo gi dicho asunto–pot tinayuyot–lao guiya pot lateria. Dios miho!

• • • • •

Guaha na taotao ye`lañg. Kumeke ilegho, maseha hafa ha pacha, ha yulañg sa` inipos broñkoña si pindeho. Guaha ha` lokue` hayuña umatrebigue` gi ti asuntoña. Estegue` mas na`mase` sa` ni guiya mismo i prohimo ti ha tuñgo` na guiya ha` i chaleg gi halom man-tomtum. Dios miho! Ayo na, maulegña mamatkilo ya unna` fan dibina ke un` baba sekosmo ya un` funas todo i hagas mapolu na fitme yan antao hao na taotao manhasso. A` Saina!

Strictly a personal view. John S. DelRosario Jr. is publisher of Saipan Tribune.