I Tiempon Noche Buena

Kada matto i tiempon Noche Buena, guaha `nai ginacha`yo` ume`e-mahalañg nu ayo na tiempo `nai sesso i familian mame man-daña gi un` plaset gi gima` nana yan tata.

Esta hu diseseha mohon na maseha pot un` rato u siña ta bira tatte i kanai rilos pot para tafanue` i manatatte na estegue` i satton na finana`guen nana yan tata–dinaña` familia gi haanen Noche Buena.

Gi hilo` todo i buruka ni finañagon i haanen gupot siha, guaha man-machuchuda` minagof, guaha lokue` man-ginacha` man-mamatmos gi tasen triniste.

Tai malefagho gi primet haanen gupot `nai sige in` kanta sunido siha ni sesso i defunto nanan mamae ha kanta `nai lalala`. Tat fuetsudo ti tuhu` lagoña nu i manmañge` siha na konkariño ginen i defunta nanan mame. Matto uttimoña i

Afañielos, mañge` dinaña un` familia `nai gagaige ha` i patriatkan familia. Siha i dos amko` i primera pisu, halige yan añkla ni sumustetene i tropa pareho ha` gi halom chubasko yan katma na tase.

Hulie` dispues na i man-agoflie` man-asustene, mientras i sesso man-adisgusto, ma-apatta siha ginen i dinaña i tropa. U fatto un` chinatsaga `nai siempre maripara na i manguot` mahetog tai bali. I humasñgon tumailayiye i otro, siempre u famadese gi uttimo besis. Bali mesñgon gi todo mattiro sa` mafatto bendision ginen hilo` `nai mas ti ta añgogho na u guaha alibio.

Dispues de hinanao patriatkan familia, i man-usune u soda` ginefsagaña, i dismiskuida-gue`, u famadese. Ti todo u fan felis, guaha para u soda` hinagoñgña dibuenamente, i tetehnan siempre kada rato matompu`. Este siha na pinadese yan chinatsaga ti presiso na un` sede gi haanimo.

Gi kada misan pasgua, ta kakanta un` sunido `nai ta papañgon hit mismo. Ilelegña patte: “…ta propone de nuebo umaregla i haanita….” Ti mapot i sustansian este na kanta: Aregla dinuebo haanen miyo para i nuebo na sakan puede in` seda` dididi` ginefsagan miyo gi entalo` chago` puntan hogsu yan tadoñg na sabanan lina`la`.

Na guaha pinasensia, planuye mauleg i mamamaila` na sakan, ya inna` fan geftao hamyo gi prohimumon miyo. Mientras tantos, sesso rumikonose i patriatkan familia maseha pot para un` ketuñgo` mas hafa i ti un` sen komprende na abiso yan finana`guen nana yan tata. Pago i ora ti `nai esta gaige gi naftan niha. Si Yuus Maase`!

• • • •

Gi hiyoñg gima`ta, ma`lag i kandet haanen gupot siha. Hu tuñgo` ha` hafa sustansiaña i talilie` gi kandet siha ni ta pega para u adotna i hiyoñg guma`: Ni uno listo para u sede chinatsaga na u puno` i ma`lag na sensia gi halom korasonta umabiba i kompleaños i Niño Jesus.

Huñgan didog i chinatsagata na biahe, lao ni este na pinadese ti u chanda dinisehata man-dimo pot para ta ñgiñge` i Niño Jesus pago na Noche Buena. Estegue` un` sensian natibo na metgot yan maug` gi halom korasonta. Chamo nina` chachatsaga, dimuye i Nanalibreta, Rai i man-rai siha deste tiempon antigo esta pago.

Gi mismo tiempo, adahe lokue` sinigon miyo siha gi chalan publiko. Yangin chatseguro hao, fan agañg ya un` makone` `nai esta lamegai ginimenmo maneska. Chogue este pot para u felis haanimo yan i familiamo na Noche Buena. Si Yuus Maase`!

Strictly a personal view. John S. DelRosario Jr. is publisher of Saipan Tribune.