Hiniyoñg Sakan 2000
Asunto: Hiniyoñg este na sakan yan hinalom i nuebo na sakan 2001 gi tano`ta Marianas.
Opiñion: Kombene na ta aregla haanita puede i nuebo na sakan, 2001, mas felis i hinanaota.
Mampos barañka i finaposta pago na sakan. Megai man-inaminasa nu i pinedoñg ekonomia. Ta diseseha na u mas fitme hinanaota otro sakan. Lao hombre este na diniseha megaiña ti asegurao hafa mamamaila` para hita.
Satton dinisehan ayo siha na familia i man-ginacha` indukto gi bandan gaston hinemlo`. Fuetsao man-daña` pot para umarikohuye i malañgon niha gi hospitat Honolulu sa` hokog i kantida ni kinubre nu i health insurance.
Soluke malofan i taota guine na sumen makat na ekspiriensia `nai siña satton ha komprende hafa guaha gi sabanan este na mattiro. Pot primet biahe ta lie` pinadesen familia gi un` asunto ni hagas ta popo`lu na dibadde. Hokog esta dibadde na amotsa. Prepara hamyo gi todo asunto, piot attikulon gaston hinemlo`.
Gi misan gayo, sesso ta kanta un` sunido ni patte ilelegña: “Propone de nuebo i haanen miyo…ta fan magof todos….” Un` satton na mensahe para todos deste planon familia gi todo kinalamten, chochu` yan relasionta yan i prohimuta.
Muñga mamatmane este na asunto. Na` fan listo hamyo lao gi mismo tiempo gai`ase` nu i otro ni sumen chatsaga `nos pot minalago`ña. Este na patte `nai humahalom kinimite gi entalo` setbision publiko siha `nai manmanhula` para u adelanta i haanen taotaota siha. Petsige mas figu` na ditetminasion guine na patte sa` trabiha memegaiña man-losgun gi este na obligasion.
Maseha ti sen guiya na sakan, sumen na`magof i sensian natibo `nai ha atotga munae` animo pot para u saonao matufoñg gi finatto i Nanalibreta. In` nanae` todos un` fehman yan felis na Años Nuebo yan Si Yuus Maase` pot i appottunidat sumetbe i publikon Marianas Felis Año Nuebo!
