Finaposta pago na sakan

Ti todo felis i finaposta na sakan. Megaiña besis `nai entre man-e`ensinahyao osino man-mamatmos hit gi tasen tadoñg na halom tano` chinatsaga pot diskuido yan dañosu na atetu.

Man-ñgaha` hit hulo` gi hegso i Deni`, lao megaiña besis `nai ni uno gai tiempo umekuñgog hafa sesso sentimenton yan pinadesen i taotao siha gi señgsoñg.

Para todo i motmut uchan mattiro, ta suñgon munae` animo pot para ta ke soda` hinagoñgta. Uno na sinisede ni mampos umestotbayo` `nai hulie` `nos kuantos familia manman-begende neñkano pot para uma`ayuda gaston malañgon niha giya Honolulu sa` hokog i balin health insurance.

Estegue` un` pinadese debi i man-ma`gasta u atetuye kabales koyenturan ayudo sa` para mona, mas megai para u fan malañgo na taotaota. Makat este i asunton hinemlo` piot `nai mana` hanao i malañgo para hospitat Hawaii. Debi Marianas u satba dibiña $4 Miyon pesos gi tutuhon otro sakan.

Man-suette hit talo `nai mana` huyoñg Marianas ginen sueddon federat `nai pañgpañg i mattiyon i kabesanten sanpapa` na guma Congresson Estados Unidos de America gi mapos na Desiembre dia 15. Ta fan mannae` agradesimiente pot mana` fan safu hit ginen un` akto `nai mapropopone ma-utot direchota gumobietnan maisa hit.

Magpo` lokue` gi mapos na mes i praimeren (primary) i pattidan republican. Duro i kuentos inafamauleg lao a`anog na madisgrana i platon paska. Dispues, guaha otro siha para u fan malago para i mismo puesto. Este na huego siempre u teug` ya i machochu` duro u fan gana gi uttimo besis.

Sige ta huñgog` na guaha adelanto gi ekonomian iya Marianas. Lao a`anog na siña ha` dumispasio i kinalamten ekonomian iya America. Iya Japon lokue` ha guaguaddia ennao na kinalamten sa` libiano sulon ginen todo i esta ha petsige pot mismo hinemlo` ekonomiaña. Mauleg i man-ma`gasta u mapulan todo señat gi todo atmos bandan tasen Pasifiko pot rason na kada lo`lu` Japon, man-tinatme hit makat na sago.

Hulie` na megai man-mamadedese gi pago na finatton haanen gupot. Lao i taotaota mana`na` este na chinatsagan niha gi fina` ma`lag na kandet Noche Buena gi hiyoñg gima` niha siha. Motmut esperansa na gi finatton i Nanalibreta, u tuñog un` fitme na bendision pot para ta kesoda` hinagoñgta dididi` gi nuebo na sakan.

Lao muñga mañeha sa` mientras mas didog i problemata siha, debi ta pañgon i metgot na sensian natibo fumana` yan sumatba i muna` fan chachatsaga hit. Hatsa hulo` ilon miyo gi hilo` fehman na ginagao na u falofan i makat na mattiro kalan guinaifen mañglo`. Muñga man-hinalañg sa` hombre si guelo yan guela masuñgon todos i minamahlao yan mattiro pot para u asegura na felis hinanaota gi halom un` dañkulo na rimulinon chubasko.

Para ayo na familia siha i man-ginacha` triniste, baiho hahasso hamyo gi tinayuyotho puede u menos mas i makat na asunton ni muna` malahyo i korason miyo. Para ayo siha i man-finagchae` yaoyao na karera pago na sakan, guadog papa` i konsensian miyo ya in` isa komo tohne. maseha pot un`rato estake kayada i pagyon haanen miyo.

Ta gagao i Saina nu i bendisionña puede u na`lo chadeg tatte i poduñg ekonomiata. Presiso na u guaha dididi` adelanto antes de u tutuhon i sigiente grupon estudianteta man-matcha huyoñg ginen i dose grado gi otro sakan. Sen mas, un` fehman yan felis na Año Nuebo para todos hamyo ginen i fiet na eskribienten miyo. Felis Año Nuebo!

Strictly a personal view. John S. DelRosario Jr. is publisher of Saipan Tribune.