Previous Story
Gi Nuebo Na Sakan
|
Posted on Jan 04 2001
I Asunto: Hinalom i Nuebo na Sakan; maila` ta fan satton umaregla haanita pago na biahe.
Opiñion: Obligao na ta tutuhon umatetuye umadelanta kualidat lina`la` todos guine gi tano`ta.
Ti todo finachucho`ta siña ta kusecha ensegidas. Piot `nai gai teneug` i asunto, presiso na ta tutuhon gi primera eskalera–fotmat na plano yan taimano `nai siña ta komple hafa i ginagagao para benefision mayotmente gi taotaota.
I futuron natibo guine siha na islas, gaige gi dos patman kada uno gi offisiat Marianas ni manae` katgo para u petsige man-mauleg yan antao na plano siha. Lamayot patte gi maseha hafa na plano, debi u yamo`nana i adelanton kualidat lina`la` gi taotao tano`.
Tuñguon` na sakan pot sakan man-malofan ya ni unabes `nai guaha satton na attension pot para uma-adelanta i kualidat lina`la` natibo guine. Huñgan, guaha siha adelanto, lao kao guaha maseha dididi` na alibio gi haaen i taotaota siha? Estegue` un` kuestion na debi i man-ma`gasta siha u oppe sin ditension.
Magahet lokue` na man-taotao hit ya buente pot este na rason na guaha siha finatso yan diskuido gi malofan siha na sakan. Lao klaro lokue` na megai gi offisiatta siha man-diniñgo nu i asunto. Gi halom un` didog na rimulino, memegaiña man-mafondu `nai debi u fan listo umakude man-sustansiao siha na asunto pot para uma-adahe i dididi` na fiñkas Marianas.
Puede mohon gi pago na sakan, mas satton na inadahe guaha gi dididi` na fiñkasta. Muñga na ta fan masoda` talo man-gugupot gi halom un` didog na chinatsaga kalan mohon todo areglao i kinalamten lina`la` natibo. Gi hilo` sensian espirton kooperasion, pinasensia ya inakomprende, siña mas talie` klaro karerata gi halom pagyo, linao yan dilubiu. Maila` ta fan aguot` kanai ya tatutuho pumetsige minauleg para todos. Si Yuus Maase`yan ghilisow!
