Previous Story
Sinague` Tase Ti Nanañga
|
Posted on Jan 11 2001
I Asunto: I sinague` tase, ni uno ha nanañga, piot `nai matto oran ma`ti osino afno`.
I Opiñion: Pot este na rason ya todo kabayeros presiso na u fan menhalom gi checho` linahyan.
`Nai pago ha tutuhon umaminasa ekonomian iya Marianas i sagon baban tiempo giya Japon yan Asia, ta fatta i sensian mañana `nai ilegta: “Si Yuus La`mon”. Man-malefa hit na i mamamaila` na chinatsaga puro checho` taotao.
Makat na kontrario sa` hagas man-chansero hit gi todo ta fana` na asunton linahyan. Esta pago ta popo`lu gi hinasota na siempre u guaha matto ayudo. Ennao na ayudo gaige solamiente gi dos patman kanaita. Ni uno u halom man-offrese ayudo sa` deste 1993, manohge hit gi dos adeñgta gi gaston operasion gobietnota.
Buente pot un` tiempo man-mamatmos hit gi tasen abundansia na taya` satton na inadahe gi todo rinikohita fiñkas tat komo kontribusion tax. Pago, ta fafana` fuetsao sakrifisio gi haanen man-malañgo gi hospitat iya Hawaii sa` ti siña ta apase kuentata guihe siha na fasilidat hinemlo`.
Esta namatman na achogha` este na chinatsaga, kalan mohon man-tai problema hit fondun publiko. Lao atan kabales hafa masusesede gi ayo siha na familia i man-gai malañgo Hawaii. Man-e`ensinahyao i los prohimos pot para umana` nahuñge apas hospitat. Este na problema siempre mas u didog para mona.
Guaha lokue` otro siha man-dañkulo na dibin Marianas ni presiso na uma-apase taimano i ginagagao gi papa` i konstitusion i tano`ta. Lao kontodo este na kuenta siha ti linañgag nu i poduñg ekonomia guine. Dispues, mauleg ta komprende na i para u na`lo tatte ekonomiata taiguihe antes, siempre u tinaka` talo siñko años na tiempo.
Pot este na rason na debi todo sustansiao na asunton linahyan sumen presiso na u guaha linisto gi propio konsiderasion pot para ta alibia na u mas didog i presente na chinatsaga. Olara mohon na guaha este na sensia gi man-ma`gasta ya ta sosoyu` na u fan ma`agim `nai matto inagañg sensian kabales na kabayero. Si Yuus Maase` yan ghilisow!
