Konbetsasion Dos Malas

Un` finagpo` misan Dameñgo, sige si Juan yan Pedro Malas kumonbetsa pot hinerat na kinalamten natibo guine. Trabiha fifitme ha` gi ha`en` niha i alifog deñgdeñg ni ginigiot` nu i pomadan Menuma`. Sige i dos rumason gi hilo` antao na konbetsasion.

Juan: “Yangin guaha kinemprende gi asunton linahyan, siempre u antao todo konsiderasion man-sustansiao na attikulo siha ni ma-intended para i publiko”.

Pedro: “Konfotmeyo` sa` memegaiña besis ni masaulag kinibruto i asunto kalan mohon huego para i man-kabayeros siha”.

Juan: “Ti siña lokue` na ta sogne enteramente i offisiat publiko siha sa` i pinegan botadot ennao siha na taotague”.

Pedro: “Magahet ennao na fino`mo lao pot mampos tianog i problema sa` listo i botadot mañogne gigon guaha finatso”.

Juan: “Yangin inayeg niha, pues debi u pañot i chatchecho` man-flohu na kabayeros siha”.

Pedro: “Hasan na tiempo `nai talie` uson rason gi dibaten asunton publiko. Buente man-atrebisao gi asunto siha sin u guaha satton na inadahe”.

Juan: “Kase i problema layeye i ti man-tataitai i los prohimos nu ayo siha na asunto i debi umakomprende. Pot ennao layeye na sesso masaulag pakiao i asunto siha”.

Pedro: “Inague` i dicho problema i ti man-tataitai i umareregla asunton linahyan.”

Juan: “Huñgan, `nai ni guiya ti ha komprende, pues ennao na finatsu u fagpo` gi chinatkomprende osino nanata na areglo”.

Pedro: “Guine ha` gi nigapña i mina` 23 na kompleaños iya Marianas, lao kaiha para estake u siña sumatba gi to`a yan antao na eskalera i mas man-presiso siha na asunton”.

Juan: “Gi fino` English ‘common sense’. Yangin ta pesa kontra i man-masusesede pago, buente ma-u`usa i komun sense”.

Pedro: “Debi i taotao ni gai plano mañetbe publiko u tutuhon gi satbasion problema siha. Ti nahoñg ni manadan offresimiento”.

Juan: “Huñgan, ti asunton mafananaan` puppy love i mafafana` `nai siña un` diroga ensegidas i hagas un` sasañgan na ‘I love you’.”

Pedro: “Buente pot palo hayuta sensian chansero na taiguine finaposta siha deste antes”.

Juan: “Hombre lao atan ha` `nai tiempon Tun Elias, Nandon Benavente, Kilili` tata yan otro siha na man-fiet na kabayeros. Man-fafachochu` yan metgot kinimiten niha pot para u adelanta linala` i taotao ni marepresesenta. Estegue` i diffirensia”.

Pedro: “Huñgan, lao guihe na tiempo man-fino` natitibo ennao siha i hagas kumayon i chalan iya Marianas `nai todo fino` niha guaha kabales na kinemprende”.

Juan: “Siña ha` dinanche hao sa` hombre este i fino` English, piot ya hagas rakudai` hao gi eskuela, makat na kontrario gi bandan taitai piot `nai matto gi patten rason”.

Pedro: “Ti ta dispreressia i los pobres. Lao ni uno lokue` sumoyu` na u atrebi siha gi checho` linahyan `nai debi na u guaha kabales na sensian menhalom kosake siña ha chogue mauleg checho` publiko”.

Juan: “Buente mauleg ta fan a`dispensa sa` nuebo na hugete este i sisteman politika guine. Adumididi`, siempre ta fan matto guihe na eskalera `nai soluke ma-eduka yan motmut eksperiensiamo `nai u felis kareramo man-ayudo publiko. Ennao na tiempo gaige pago gi me`nan pottan Marianas”.

Strictly a personal view. John S. DelRosario Jr. is publisher of Saipan Tribune.