Chetnot Daibetes (Diabetes)

Asunto: Un` aminasu gi hinemlo` natibo `nai ma-umenta i numeron kaosan daibetes.

Opiñion: Sumen nachatsaga este na mensahe ya debi i natibo u atetuye hafa homlu` siha na neñkano`.

I man-malagnos siha na infotmasion guine gi alacha pot chetnot daibetes, klaro na megai mas man-nina`ye nu este na chetnot deste dies años malofan.

Klaro lokue` na solu ke guaha inadahe gi natibo siha, mas este na chetnot para uma-umenta gi halom taotao tano` gi primet 25 años pago na siglu.

Mas lokue` ma-umenta i numeron taotaota pot matai reñihion ya solu manera `nai siña man-la`la` i para u fañaonao gi programan hemodialysis–makulan haga` tres biahe gi semana gi hospitat CHC.

Este na chetnot ti iya Marianas ha` `nai kumahulo`. Matto chiña hulo` gi eskaleran sago gi entero iya America. Lao i ma-a`atan guine i kumahulo` numeron taotao ni man-nina`ye daibetes yan ayo i man-matai reñihion niha.

I para ta ataha este na chetnot antes de u fatto hulo` gi eskaleran sago `nai megai man-nina`ye, gaige este na pudet gi mañaina ni gumuguot` atoridat disposision hinemlo`. Huñgan, mauleg lokue` na kontribusion i sisteman edukasion ha implementa pot hinemlo`. Siempre u fan eyag i man-hoben man-mauleg siha na bisiu pot hafa mauleg para u kano` diariamente.

Lao i responsablidat gaige lamayot patte gi disposision mañaina gi gima`. Sumen mauleg yangin i dos saina ha tutuhon humusga hafa siha na neñkano man-homlu` para uson famaguon niha. Adumididi`, siña makonduse famaguon niha kumomprende sa` hafa na mauleg na umana` bula mas golai ya gulusina gi sentadan niha.

Mientras tantos, tutuhon lokue` rumibaha uson mantika, asiga, yan asukat gi preparasion sentadan familia. Siña ha` buente makat gi tutuhon, lao achogha` anagho na karera, ti un` fatto gi chimo yangin ti un` tutuhon ginen i primet pasu. Tutuhon deste pago umaregla homlu` na sentadan familia. Si Yuus Maase` yan ghilisow!