Dinisehan Mañeluta
Todo taotao, maseha mano `nai gaige, mafatto dañkulo na diniseha para u birague` tatte guihe na lugat `nai mafañago-gue`.
Kao mauleg offisioña osino bisnesña gi maseha mano na tano`, todo i tiempo gaige ha` ayo na diniseha i para u birague` tatte gi lugatña.
Hombre i galago `an para u matai, siempre i iluña ha fafana` ayo na direksion `nai mafañago-gue`. Kuando menos i taotao ni gai siñiente pot ayo na lugat `nai ha tutuhon haaniña `nai patgon.
• • • •
Hu mente este na asunto pot i apmam na dinisehan taotaota ginen sankatan siha na islas bumira siha tatte gi tano` niha.
Huñgan, guaha chinatsaga pot pagpag botkan. Lao, achogha` lokue` ta rikonese sin ditension, iya Hawaii (Big Island) `nai gaige i mas dañkulo na botkan gi entero Estadon Hawaii.
Ti chinema` i para u fañaga i taotao sa` makomprende na patte gi haanen niha i pagpag botkan. Hu lie` `nai machuda` kalan finalagon hanom i guafe ginen Mt. Mauna Kea.
Solu ti sineñge un` Gima` Yuus gi kanton tase. Esta na matman `an un` konsidera haf` taimano na todo oriyaña ayo na fasilidat kimason. Lao i Gima` Yuus ti pinacha. Ma-mueba dispues ayo na butto ya mapega gi nuebo na soñgsoñg.
• • • •
I taotao sankatan siha na islas lokue` matuñgo` hafa naturatña i tano` niha. Ginen ennao, todo i tiempo man-listo para u fan malago para i fina` liyañg yangin u fan finatoigue iran botkan.
Hafa ma-aliligao nu este siha na mañeluta?
I señgseñg `nai man-mafañago siha yan i pas yan trankilida ni tai akomparasion. Esta pago sige ha` madiskute este na asunto. Mauleg u makontinua este na pinetsige. Tanae` kampo i mayot pot para u asegura na sumaonao ennao siha na islas gi mapegan fasilidat eskuela yan dikiki` na fina` hospitat.
• • • •
Kontodo guaha dañkulo guinifiho lumie` ennao siha na islas. Sesso de hu huñgog na i kliman iya Pagan pareho yan Hawaii. Buente pot pareho gi mapa sagan niha na guaha sumen mauleg i kliman ayo na tano`.
Lamayot patte na sesso hu guife iya Pagan pot megai man-bonito siha na estoria hineñgogho deste ke patgonyo`. Mampos antes sesen magofyo` `an hu huñgog na matto i batko ginen isla.
Man-animosu na taotaogue man-mano`su` niyog. Ma-tala`, dispues makostate ya mapega gi un` banda esta i finatton batko. `Nai matto i batko, kada familia ha uma kestat niha sine`su` ya sige papa` gi kanton tase.
• • • •
Huñgan, guaha fina` lateria machuchule` hulo` kada mes. Los dimas, todo neñkano` niha fresko na guihan, katne yan kinene` fanihe, ayuyu yan otro siha na paluma. Dispues, man-fafacho`chu` ya sige man-mananom para neñkano` familia.
Gi minachom atdao, guaha humanao kumasadules tano` osino tase. I pumalo man-daña` gi halom komunidat ya man-adiñgan pot grasia siha guihe na haane. Bula mantension para familia ya solu para u famadese i ti macho`chu`.
Talo, pago i tiempo `nai siña u guaha mafotman fotmat na planon para ta sede i mañeluta bumira siha tatte gi hagas lugat niha. Si Yuus Maase` yan ghilisow!
Strictly a personal view. John S. DelRosario Jr. is publisher of Saipan Tribune.
