Previous Story
Amot bineno gi empleao siha
|
Posted on Feb 08 2001
I Asunton: Masoda` na guaha siha na empleao gobietno mau`usa amot bineno dispues de man-mariseta.
I Opiñion: Ti namatman i resuttan riseta ya mauleg na todos u fan mariseta para hinemlo` niha.
`Nai malagnos gaseta na guaha siha na empleao CUC umu`usa amot bineno duranten chochu`, ti namagof na mensahe sa` umanog klaro na trabiha este na problema didog gi halom taotaota.
Mauleg i bumenenuye sisteman niha na u fan makone pot dos rason: 1). U fan ma-ayuda lumagnos i bineno ginen tataotao niha. 2). U maketuñgo` haye otro siha umu`usa osino bumebende amot bineno guine.
Mampos chatpago na litrato talie` guine siha gi alacha pot abuson amot bineno (shabu osino ais). Ta huñgog na guaha man-pinino` taotaota pot inipos na bineno gaige gi sisteman niha ya inaflito titanos niha. Man-matai gi maigo` niha ya masoda` na esta atalag `nai manana si Yuus.
Dispues, ti hoñgiyon i resuttan uson amot gi man-hoben siha na famaguon famalaoan, kontodo asagua. Ha benden ñaihon onrun niha `nai pot amot bineno, ha bende tataotao niha. I man-asagua siha na famalaoan chatpago mampos finapos niha ya lastima sa` hagas man-respetao na taotaota gi komunida.
I mas seriosu na checho` kriminat pot uson amot `nai mabende ennao na attikulo gi man-hoben siha. Fuera de hana` lastima haanen niha, uttimoña kontod familia (lao hagas fitme na pisu yan fanliheñg `nai makreansa) ti ma-ekuñgo `nai hinatme nu i fottolisan amot bineno titanos niha.
Afañielos, ti siña na para ta susuñgon madisgranan familia yan destrosion man-hoben pot uson amot bineno. Maila` ta fan aguot` kanai ya todo atmos banda ta kontra gi todo manera pot para ta ataha este na destrosio gi familiata siha. Fanacho paog mientras guaguaha tiempo para ta aregla halom gima`ta. Si Yuus Maase` yan ghilisow!
