Kumahulo` uson amot bineno

I Asunto: Uson amot bineno gi entre natibo mas ma-umenta.

I Opiñion: Debi ta ataha este na sago antes de u didog mas i chetnot.

Esta ha` makat kinalamtenta pot poduñg pisun ekonomian iya Marianas deste kuatro años na tiempo. Ti presiso na ta atisa mas probleman halom familia ginen uson amot bineno.

Sumen nachatsaga i para ta tuñgo` na ma-umenta talo uson este na bineno gi halom taotaota, deste man-hoben, medio idat yan man-amko`. Pot fabot ataha uson este na bineno sa` dañosu para todo i umu`usa.

Este na bineno hana` bibu mas i kinalamten korason ke naturat. Gigon un` chupaye, esta tres dias ti siña hao maigo`. Unna` fachochu` mas ke naturat i korasonmo. Nina` suha ganasmo chumocho.

`Nai taya` esta ganasmo sumaguahne estomagumo, ensegidas ha tutuhon tataotaomo umusa todo mantikan ni gaige gi sanhalommo. `An hokog mantika, ha tutuhon kumano` sensinmo. Pot este na rason na tuñguon` haye umu-usa amot bineno sa` mayaye ensegidas.

Mas didog para `un padese yangin sige ha` `un gulusune i bineno. Fuera de baba para hinemlo`mo, mas dañosu para i familiamo sa` uttimoña `un tutuhon umaña i membron familia siha. `Nai ni mona ni tatte, siempre `un tutuhon bumende i mas `un pinitiye na kosas familia. Hafa na botin sin ni tai timon ni masotta huyoñg gi tase.

Todo ha` uson este na amot bineno seriosamiente dañosu gi familia. `Unna` lastima todo appottunidat `nai siña un` usa para `un kreansa i man-hoben na famaugonmo siha. Sumen lastima `nai kontodo hago nu i saina `un yute onromo sa` `un sede na `un kineni` haanimo nu i bineno.

Hombre `an matompo` i taotao, tat seguro na siña kahulo` ensegidas. Kuando menos i `un binenuye tataotaomo, mas makat para `un chule` tatte ayo i guaguan na onromo yan tiempo ni `un dispeddisia. Pot fabot atetuye umataha uson este na bineno. Para minauleg todos yangin ta guaddia i guaguan na haanita yan familiata siha. Si Yuus Maase`!