Kinalamten todo atmos banda
I Asunto: Dumispasion kinalamten ekonomia gi todo atmos bandan iya Pasifiko.
I Opiñion: Hafa signifikasioña este para iya Marianas gi sigiente siñko años na tiempo.
Oppan gi gaseta siha na dumispasio i kinalamten ekonomian Estados Unidos de America. I kantidan fektos ni maproduduse gi fakteria siha poduñg papa`. Gi mismo tiempo Japon ha pupulan este na señat pot para u pesa kao ti u inaminasa todo i monhayan esta ha chogue para u aregla tatte mismo ekonomiaña.
Ekonomia layeye kumeke ilegña salape`. Ha embrarasa siklikon deste gaston `nai maproduse un` fektos, kantida ni dinimamanda nu i metkao siha, yan mañan i taotao ni fumafahan i ennao na attikulo. Lamegai otro siha asunto mañasaonao guine na kuentas ni dumetetmimina hinemlo` kinalamten henerat makinarian ekonomia.
Guine gi mapos na semana, lamegai na taotao mana` fan basta gi checho` niha guihe lago. Dimalas sa` mañaonao gi maribahan operasion kompania (bisnis) siha `nai man-machochochu`. Un` metgot na indikasion na dumispasio yan maribaha i hagas lagse` na ekonomian Estados Unidos de Amerika.
I mas man-dañkulo siha na kompania giya Japon mapupulan lokue` hafa masusesede gi otro bandan Pasifikio. Maseha guaha mensahe pot adelanto gi bandan ekonomiaña, mayoria sumañgan na kanaha` taya` masusesede guine na patte. Trabiha i taotao ti manlisto gumasta i pottanmonedan familia taimano antes.
I pinadesen poduñg ekonomian Japon, fuetsao i familia siha magasta pine`lon salape` para edukasion, hinemlo` yan gaston `nai man-amko` siha. Achogha` u na`lo tatte i ekonomiaña, primera siempre mafachuchue` manana`lon i man-magasta siha na pine`lo. Kumeke ilegña na maseha u guaha sineyo` para u fan bakasion, memegaiña siempre umattende ma-apasen pottanmonedan familia ni esta magasta gi halom mattiron poduñg ekonomian Japon.
Ginen este, makat ta sañgan na siempre u na`lo tatte i hemlu` na kinalamten industrian turista guine gi mamamaila` na siñko años. Pot este na rason na propio todos u eksisia inadahen pottanmonedan familia estake magahet na guaha adelanto gi mismo ekonomian iya Marianas. Si Yuus Maase` yan ghilisow!
