Mapresetban Tradision Natibo

Kadarato ha` i man-pastatahe man-malagnos gi lugat niha. Man-estaba gi sanlichan na patte guine, dispues man-matransfere katan Magpi`. Pago, man-makehaye gi kotte pot ti man-malago` man-huyoñg ginen pastahen niha.

Maila` ta ebalua hafa umisague i presente na chinatsaga gi entre man-pastatahe giya Magpi`:

• `Nai ta diskuida hit nu i areglon tano` pot presetbasion man-indihinao siha na tinanom yan ga`ga` gi guine, humalom i federat ya guiya dumispone este na asunto.

• Ha choneg na u guaha 300 hektarias na tano` Saipan mapresetba, un` disision na mampos ha animinasa katkuet lugat fangualuan` guine yan otro siha fina` propositon adelanton ekonomia.

• Esta pago ni uno kalalamten (ni sikera i representadotta giya Washington as Juan N. Babauta) pot para umasede Marianas libre ginen este na areglo.

• Soluke guaha offisiat na ginagao yan dispensasion ginen este na areglo, todo planon adelanton ekonomia siempre umatmos gi tasen mañana.

Obligasionta muna` komprende i gobietnon federat hafa na mampos dañkulo na animasu i presente na areglo. I rason i sigiente siha:

• Kustumbren tano` mamogsai ga`ga` gu hilo` bisnis yan lokue` uson familia ni man-pastatahe.

• Dehemunos-gue` i federat hafa tradision natibo guine na patte sa` ni ñgaian` na tiempo `nai siña ha komprende sustansian pinegsai ga`ga` gi halom natibo.

• Pot ihemplo: Achogha` pinegsai manog gi lancho, `nai ta puno` para amotsan taloane, man-daña hit yan familia para ta benefisia ennao na pinegsai. Hafa sustansiaña este na kaddon manog? `Nos pot ta kado pinegsaita, lao un` chalan ni muna` daña i familia ya mas masimiento dinaña` familian natibo.

Impottante na ta komprende giya hita mismo hafa sustansiaña pinegsai ga`ga gi lanchon natibo osino tano` publiko. Achogha` i guaka `an mapuno` ya mabende memegaiña, i sesebla mafritada ya mapatten ñaihon i tetehnan na sensin yan to`lañg para mantension familia siha.

Yangin ta komprende este na tradision natibo, espesiatmente i tadoñg yan uma`atog na sustansia (dinaña`) gi halom natibo, pues obligasion i depattamento ni finagchae` nu este na asunto plumaiteha gi federat na mampos dañosu i presente na areglamento.

I fitme na tradision natibo gi fangualuan` gaige gi pinegsai ga`ga` yan tinanom. Rason? Ni hafa na ira u fatto, libre i kamute, dagu, sune, yan kalamasa gi papa` yan hilo` tano`. I ga`ga` sobla de man-safu gi este na mattiro. Estegue` `nai ha sosoda` alimiento i natibo dispues de malofan i ira.

Soluke ta petsige malagnos iya Marianas ginen este na areglon federat, mas teug` i ta fafana` gi dinisehan pot para ta abiba umadelanta kualidat na lina`la` taotaota siha. Ti mapot i asunto lao debi ta fachuchue` osino hita ha` solu humuñgog` hafa chinatsagata siha ginen un` areglo ni fumufuñot linala` natibo siha guine gi O`Perlas iya Pasifiko. Siña mohon ta chogue` este pago na haane? Si Yuus Maase` yan ghilisow!

Strictly a personal view. John S. DelRosario Jr. is publisher of Saipan Tribune.