Sensian Pinasensia

I Asunto: I malaet na sentimento kontra prohimuta ginen hiyoñg ni man-machochochu` guine.

I Opñion: Sensian pinasensia yan toa` na kinemprende sa` hita mismo muna` fan halom.

Gi mapos na bente años, mafañago un` atetu (maña) na guaha siha na chochu` para taotao hiyoñg. Pago ayo i libiano para i taotao tano`. Kontodo ayo siha i rumisisibe ayudon federat tat komo food stamps mangai muchacha. Ti komprendiyon i masusede.

Matto gi ta atisa este na atetu kulan mohon hita ha` famaguon i Saina. Ni uno malago` aplacha` sa` ta popo`lu na checho` taotao hiyoñg tat offisio komo checho` katpenteria yan otro siha bokasion `nai debi un` usa dos kanaimo.

Gi karera mona, kontodo atetun tai achaigua ta sede halom gi korasonta na esta ta a`atan papa` i bisitata siha ni fumachuchuchue` hit gi adelanton tano`ta. Sesso ta huñgog na este na grupon empleao ti manma`apase nu i amon niha. `Nai ta rikonose, taotao tano` sumasaonao. Huñgan, guaha lokue` taotao ginen otro lugat.

Gi halom maipe na somnag yan todo klasen mattiro, masuñgon i makat na chochu` pot para u fan mangana dididi` para i familian niha. I sakrifisio mampos dañkulo pot para u asegura na guaha probision familia deste neñkano` esta apas eskuela. Didog na sakrifisio gi bandan este siha na empleao. Lao masuñgon pot linala` familian niha.

I punto: Este siha na taotague i man-estaba gi fihonta `nai lagse` i ekonomia ya duro iya Marianas manhatsa hotels yan otro siha fasilidat adelanto. I natibo mama` i ma`gas gi un` banda sa` masa` na unna` aplacha dos kanaiña. Mientras tantos, sige los prohimos manmachochu` maseha guaha mas ti homlu` na atetu ginen i natibo siha guine.

Gi katkuet manera, este siha na bisitata man-taotao lokue` ya maseha man-silensio gi malaet` na atetu ni ta nana`yan siha diaramiente, ti matulaika i fakto na man-taotao este siha na prohimuta. Ti ilelegta na kombida halom gi apusienton miyo. Lao, fanue` lokue` na ta agradese i kontribusion niha gi todo pinetsige pot para ta adelanta haanen taotaota. Si Yuus Maase` yan ghilisow!