Linao siha gi oriyata
I Asunto: Sesso ta taitai gi gaseta pot linao giya Japon yan otro lugat siha giya Asia.
I Opiñion: Kontodo iya Marianas ha sesiente linao tadoñg gi sankattan na islas siha.
I man-estudiao siha na taotaogue pot botkan giya Japon, mapredikta na un` dia siempre u fatto i dañkulo na linao `nai megai para u fan matai yan iridao gi siudan iya Tokyo.
Sesso esta malagnos ripot na linao i sanlichan osino sankattan na patte giya Japon. Kontodo hita guine giya Marianas, ta sesiente linao ginen tadoñg na papa` tano` piot gi sankattan siha na islas.
I fuetsan kada linao mamimide gi mafananaan` Richter Scale. `Nai matto fuetsaña i linao gi 4.5 gi Richter Scale, ni un` taotao siña tumoge sa` mampos metgot esta i mayaleñgyoñg hilo` tano`.
`Nai mas metgot fuetsaña, kontodo telefon yan man-dañkulo siha na troñko ha tutuhon tumomba, kontodo gima` padet siempre u fan daño. Ta diseseha na pot siakasso masusede este guine, u fan safo i memegaiña `nai ha palo`pu` hit este na ira.
Pot este na rason na mana` guaha komite `nai `nos kuantos ahensian gobietno makondudukta eksisio para `an ha gacha` hit este na ira. Deste man-akuden serioso na irida siha yan otro programa tat komo mamueban taotao hulo` gi fina` hogso` ni mangaige gi tagpapa` na lugat siha.
Ni uno siña prumedikta ñgaian` `nai para u pañgpañg maseha hafa na linao. Pot esta na rason na debi mohon u guaha mas sesso otganisao na eksisio hafa para umachogue gigon pañgpañg este na ira. Mas menos i mattiron minasa`pet sa` esta i publiko ha komprende hafa para uchogue.
Gi mismo tiempo, mauleg ayo siha i mangagai tano` ha` fina` lacheria na u tutuhon man-mananom aguon haya tat komo sune, mendioka, dago, kamute yan otro siha mantension familia. Ayo para u soda alibion niha i prumepara siha deste pago. Esta na`chaleg para ta sañgane taotao na u fan mananom. I punto: Muñga manañga na estake ha palo`pu` hit mattiron ira na para ta fan e`ensinahyao umaligao i hagas ta chanda gi un` banda–satton na sensian preparasion. Tutuhon pago! Si Yuus Maase`!
