Tradision natibu

Na magof `nai tafanague famaguon respeto kontra siha na maisa. Ginen este na tradision natibu, man-motmut lokue respeto gi prohimun niha. Mafañago sumen likido na pas yan mange na relasion gi entalo todos gi maseha mano na komunidat guine siha na islas.

Gi mismo tiempo, komprendiyon i rimulinon hafa i modetno na Marianas ha demamanda ginen kada uno giya hita. Ti mapot ta sodae` este ineppe gi diario na chubaskon linala`ta. Ñgaha` hulo gi lañget ya un` fangagao bendision, pinasensia, kinemprende yan minesñgon gi kareramo.

Afañielos, `nai hu lie` fuetsan tinayuyot gi oran didog na chinatsagagho, matulaika todo mañahu yan kinemprendeghu pot linala`. Deste ayo na tiempo (1987) hu tatiye fiet yan satton i diario na nobenan Patronhu as St. Jude sa ayo solu na tinayuyot `nai hu sosoda` pas, trankilida yan ginefsagaghu.

Hu yute gi halom tasen linala`hu i añklan espirityuat pot para baihu siña mamokat gi tinas yan fitme na plaset pareho ha` gi halom katma, dilibiu, pagyo yan linao. Fitme hu añkla i linala`hu espirituat ya diariamente hu gagagao i Saina ayuduña yan bendisioña diariamente gi kinahulo yan minachom atdao.

Este na añklan espirituat fitme giniot hao gi maseha hafa na mattiro un` fana` gi ha`animu. Makat gi tutuhon lao na fitme yan mesñgon hao gi katkuet manera. Los uttimos, siempre gi hilo hinimidde un` fanayuyot maseha mano `nai gaige hao. Fa` kustumbre lokue i para un` tayuyute i esta manma`agañg para i taihinekog na deskanson niha. Este un` dikiki na checho kilisyano lao motmut premiuña gi birada.

* * *

Hu suhahaye lokue taotao ni mampos a`gang piot ayo i hafa` ha tutuñgo` i ti ha tuñgo`. Repara lokue i taotoa ni antao yan gai sinahguan kalaberan iluña sa` mayotmente silensio gi un` banda. Ti u bulantario hafa tiniñgoña solu ke mafaisengue`. Esta mange makombetsasiuni sa` menhalom yan sustansiao `an umadiñgan. ***
Guaha lokue hu soda hafa ha tutuñgo asunton linahyan siha ni ti ha tuñgo. Buente ñalañg rekognisasion, onru yan dignu na respeto. Era guiya i prohimu as Gregorio Cruz, komandanten `nos kuantos membron i Taotao Tano.
Gi tutuhon, listoyu umakanteha este na inetnon pot para bai` fan ayuda. Lao dispues `nai hu lie` na todo kinalamteña si Goru mampos abarambao, sumeha-yu` sa` taya` bisneshu sumaonao gi grupon impitu, gueko `sino na`tata. Na` mamahlao i para un` atrebi hao gi ti fafayimu ya guiya este i metgot na heñon inetnon Taotao Tano. Mas na`mamahlao `nai klaro na ti fitme gi dos adeñgña gi dicho asunton linahyan siha `nai tineteka direchon natibu maprotehe esta`i uttimo suspiros. De dios, amigo!
Lao para todo i aminasu, trabiha gaige ha gi korasonhu i para bai` asi`i` i ignorante na prohimuhu. Eyag hafa sustansiaña i fino` i Saina `nai para umapuno acho` un` palaoan: I tai mancha finenina u fan dagao. Egaga` yan un` eyag checho antao na taotao sa` hagas entero sibilasion taotao gi todo elmundo hagas ma-upos i tiempon antigu.
Trabiha tutuhon ha` este señor sa lamegai para bai` na`yan hao gi dispues! [B][I](John DelRosario)[/I][/B]