Grasian konbetsasion

Lamegai besis antes `nai matachoñgyu` gi un` banda umekuñgog man-grasiosu siha na konbetsasion mañainahu. Ayu `nai hu huñgog finapos biuhu gi tiempon Haliman giya Yap yan `nos kuantos tautau-ta.

Ayu siha na dinaña` `nai hu huñgog pinadesen biuhu ni mapresu ni Japones antes de gera pot ha tuñgu` dididi` finu` Iñglis. Era, bayeneru un` tihuña ni mattu gi sanhaya na patte giya America. Gi biradaña mamahan leblu siha para i lahiña, era si bihun mame.

Sumen edukau na dinaña ni mahuchum yan paire na sena ni maprepara para todus. Ayu na inetnon `nai hu tuñgu lokue` haye tumuge` kantan Chamorro yan Carolinas siha na esta pa`gu na tiempu ta huhuñgog gi misan gayu.

Anchu finapos biuhu lau estake ha diñgu ham, ayu `nai hana` fafagpu` ha`aniña i manaitai leblu antes de u deskansa. Guiya `nai umeyagyu` kaddun manog fresku yan sashimi. Adumididi` mafañagueyu` preparasion este siha na putahe estake lagseyu` gi kusina.

Guiya lokue` i amku` fumana`gue ham man-ekuñgog gaseta gi radio ni oppan halom ginen Japon yan otru nasion siha. Deste ayu na tiempu kulan hu offisiona tumatiye gaseta mientras kinafefe ham `an pueñge. Manhalom na amku` ni tumuñgu` kabales tres eskaleran finu` Chamorro.

Lastima sa` ti hu offisiona liñguahe guihe na tiempu mina` ti hu tatiye umeyag. Gaige ha` gi fihonhu i tiuhu Bilin (William S. Reyes) yan asaguaña para `an guaha dinidahu finu` Chamorro. Dañkulu yan fitme na ineyag hu rikohe ginen dos sainahu piot gi bandan relihion. Siha i dos kumondukta mauleg kantan Gima Yuus gi koru kada Dameñgo.

Hu agradese ayu na dinaña` familia ni gumu`ot ham hihot pot anaku` na tiempu.

`Nai echuyu` lahe, guaha `nai hu dalalag gi biahu man-ayuda gi fina` che`chu` fandañgu `sino finatai. `Nos kuantos dinaña `nai hu soda` mas parientela yan haye siha familian defuntu tatahu.

Oppan masañganña minauleg tatahu parehu ha` halom Chamorro yan Karolinas. Sige dispues hu ekuñgog mañainahu mismu pot para bai` konfitma minagahetña i man-sañgan pot i amku`.

Mafattu gi hinasoghu haf` mohon para finaposhu yangin guiyayu` umesgaihonyu` mona deste `nai ha diñguyu` sais dias antes de mina` siñko años na kompleañoshu.

Guaha lokue` `nai mattu gi hinasoghu un` sumen mauleg na primuhu ni matai aksidiente. Haf` mohon ya soplu yan kau haf` para offisioña?

Lokue`, mampos ha kone`yu` i mauleg yan pas na dinaña` komunida antes. Gi oran nesessidat, man-gaige yan kanai `sino ayudon niha. Manana`lu tatte parehu `nai guiya gai tareha ma-ayuda. Ni unu sumeha gi che`chu` komunida.

Tai malefaghu ni dibatde na platun guihan `an taftaf oga`an `sino minachom atdau. Pa`gu, debi ta sugu` gi kanton chalan `nai mafogse pottanmoneda-ta. Antes dibatde, pa`gu fahan gi katkuet sakudida. Ai na minatulaika i tiempu.

Kantida pinegsai mame manog antes gi lanchu. Kontodu babue, ñgañga` yan chiba. `An taya` chinili` lateria, pues dimalas dos poya `sino tandan. Adahe na pairen katdu ni mana` dinilalag ni sumen pika na finadeni`. Dispues, fan espiha fan asonmu estake oran manyabau ta`lu.

Mina` paire ayu siha na pinegsai sa` puru naturat na `an soblan kinisecha inna` sesetbe. Taya` fina kometsiu na `nababue ni mana`ye tinilada na amot (growth hormone). Poresu na homlu` todu katnen pinegsai antes. Sumasaunau kalamasa, mendioka, sune, kamute, kañgkuñg, choda, kañgkuñg na tupu.

Magahet na man-makreansa ham gi halom gualu` piot gi uttimon semana. Deste ke manunog ham gi kareta in` tutuhon man-manyabau yan hale` tañgantañgan. Guaha siha na kalaskas yan sosge` in` sistene para nika yan dagu. Los dimas, todu man-poduñg dispues de in` señge ni redan kareta. Sen na`magof uttimon i ha`ane lau esta ni para chaleg ti bale sa` in` tutuhon mansikat gi kareran para i gima` man-yayas.

Estague` tirun hoben guihe na tiempu fuera de peskan halom tanu` yan tasi. Ineyag linala` familia sumen metgot gi todu kinalamten.

* * *

Ti hu tuñgu` na na`bulahcu i ates `an un` daflogue. Ni ti hu tuñgu` na fotte bulachuña mames tuba. `Nai para i gima` `nai anog fottalisan tuba. Tat ti hu sufa` na rinkon gi karera papa` gi hegsu`.

Deste ayu hu adaheyu` mames tuba. Dispues, fotten puti `nai ha yalaka` estomaguhu. Esta sumen u mafamaulegyu` yan pettan i kemon. Puru leksion para man-inosiente.

* * *

I atdau kahulu` gi sanhaya, man-ina dispues tumunog gi sanlagu gi lemlem tautau. Ayu `nai bai` chathinasso `an kahulu` gi sanlagu. Pot dios mihu!