Edukasion Famaguon-ta

Kada ratu mapusturaye finana`guen pot kuttura yan tradision. Un` obligasion mañaina ni listu para umapega guatu gi sisteman edukasion.

Gi memegaiña besis ma-upus i dichu pisu ni mafafana` diariu. Machoneg prinipone ni tai añkla yan sustansia gi mapetsisige na asuntun kuttura yan tradision.

Mapropone sisteman edukasion kumu pisun finana`guen liñguahe pot para uma-abiba usuña petpetuamiente. Ti marikonose haf` propiu fuñgsion sisteman edukasion `an mattu gi asuntun fotmalidat finana`guen liñguahe. Puru che`chu` hasupag na priniponen lai. Dios mihu!

I kuestion ti mapot: Na ti primera edukasion i patgon matutuhon ginen halom guma` famiia? Kau hagu mismu ni saina unna` sesetbe liñguahen hila` nanamu gi famaguon-mu? I machogue na estudiu gi usun liñguahe gi halom gima` Chamorro ilelegña na 90 pot sientu gi familia man-finu` E`Eñglis desde oga`an. Haf` mohon ma suhun liñguahe gi hilu` este na attura?

I che`chu` sisteman edukasion i para u konfitma yan simientu haf` i famaguon man-mafana`guen niha ginen i gima` gi hilu` fotmat na leksion. I para umasot-ta i sisteman edukasion para u katga este na obligasion che`chu` muron. I mañaina debi siha u chahlau primera edukasion famaguon niha! Na ti hagas mapraktitika este guine?

Kulan man-flores mañan man-deskatgan obligasion saina gi otru ahensia ni tai obligasion! Ke lau kau ta komprende obligasion halom guma kumu saina? Sin usun liñguahe gi halom guma` mauleg ta prepara ma-enterun hila` nanata gi ti apmam yan pa`gu. Estague` na chalan `nai man-gaige hit pa`gu. Hita mismu umaminasa haf` naturat gi bandan liñguahe!

Benifisiosu: I man-mehnalom siha na professot pasifiku pot liñguahe umesplika haf` para umasusede `nai ti man-mafana`gue famaguon man-mañgge` gi finu` niha. Gi halom 25 años matai siempre i liñguahe. Hombre konbetsasion ta u`upus diariu. Kuando menos i finana`guen matuge` finu` Chamorro.

Este i hu tutuge` sih na attikulu gi finu` Chamorro petsonat yan maisa na inestudiu pot taya lepblon mañgge` gi fino`ta. Dispues de todu `nai matompu`yu` adumididi` hu danche dodoplaña. Hu birayu` tatte gi tinige` biuhu yan sattun na inekuñog konbetsasion mañainahu para bai` ke danche liñguahen Chamorro.

Sige mona hu soda` na sumen popble na liñguahe kase pot 400 años ni makepunu` desde Españot, Haliman, Japones yan pa`gu Amerikanu. Ya maseha makat na pasu ni unabes `nai sumehayu` tumuge` haf` gaige gi hinasoghu. Po`lu ya i manatatte u sineseda` haf` hu pluma gi todu asuntun linahyan guine. Kumeke ileghu patteyu` gi estorian tano`ta na hu prekura mañgge` asuntota siha.

Magahet na lamegai na asuntu inipus mante`ug. Debi bai seha un` ratu antes de bai tuge` haf` hinasoghu. Diariu este na eksisiu pot para bai` asegura na klaru kinemprendeghu gi haf` hu esplika dispues. Ginen este na modun inatuñgu` `nai hu papañgon tatte haf` liñguahen este siha na petlas.

I Difirensia: Ti parehu konbetsasion yan matuge` na finu` Chamorro. Libre yan libianu i tautau ha sañgan sentimentoña gi fina` konbetsasion. Taya` mapega areglun pot usun grammatika yan palabra. Sañgan dibuenamente hinassomu ya i inetnun un` inekuñog kau propiu yan kombeni. Libre na ekspressiu ginen todu pattisipante.

`Nai mattu hau gi bandan mañgge` ha nesessita este na eksisiu fotmalidat desde asuntu, usun faktu na infotmasion, grammatika, propiu na usun yan pinegan palabra, yan komprendiyun na tinige`. Dispues, debi un` bira hau tatte rumikonose kau un` komple gi hechuran tinige`mu haf` intension-mu.

Manadan palabra gi finu` Eñglis taya` gi finu` Chamorro ni tampoku konseptu ni guaha `nai ta fagcha`e. Todu i dos debi umapula` para umakomprende sin ditension. Presisu lokue` na un` tuñgu` haye yan haf` na eskaleran mantataitai un` fafana`. Hu apupunta entalu` siete yan nuebe gradu na estudiante gi tinige`hu gi todo atmos bandan liñguahe. `An hu komple este pues kase felis presentasion-hu. Tai bali mabanidosuye usun man-dañkulu siha na palabra ni hagu ha` tumuñgu`.

Kuttura: Sessu tana` paha usun palabran “kuttura” gi konbetsasion-ta. Kulan mohon satbasion gigon ta usa para ta defende direchun natibu.

Lau haf` pa`gu kutturan natibu gi todu atmos banda? Haf` aidentifikasion natibu guine na patte? Guaha `nai in` hasu este na puntu gi konbetsasion tradision tanu`?

I tradision natibu ha tutuhon maliñgu desde finagpu` gera `nai ta tutuhon man-machochu` pot sueddo gi praibet yan gobietnu. Magahet na mas libianu macho`chu` ke todu dia gi papa` somnag gi hagas gualu` yan tasi. Estague` tutuhon mappla` kuttura yan tradision gualu` yan tasi.

Taya` uttimu na sahyan natibu i liñguahiña. Hombre este na sahyan adumididi` sige maliñgu mientras mas i natibu hana setbe finu` Eñglis gi halom guma` niha. Nubienta pot siente gi familia pa`gu finu` Eñglis ma-u`usa diariu.

Seriosamiente, haf` pa`gu kuttura-ta? Mauleg na kuestion para konbetsasion todus gi oran amotsa yan fina` kafe. Ginen konbetsasion-ta `nai adumididi` siña ta pula` ineppen kuestion pot kuttura-ta gi modetnu na Marianas.

Paluman Apu: Bes enkuando gi lemlem tautau guaha `nai sumugu` un` paluman apu gi tatten guma`. Hu tuñgu` na guaha-yu` bumisisita. Tumekun-yu` manayuyot. `Nai tumalag hilu`yu` esta gumupu para otru lugat.

Guaha estaba gachoñgña lau dispues guiguiya ha` namaisa. Enfin sumusugu` giya hame teñga gi minachom atdau. Mauleg na fina` konsuelu gi todu finatoña. Sessu teñga hu konsidera haye gi man-madispone na parentela man-bisisita. Humahalom-yu` lau orasion i propiu ineppe. Hu hoñgge na i paluma guiya i hechuran espiritu!

•••

Biba: Sige i tropan para u fañgandidatu madopbla mañgas chininan niha. Kada unu motmut konfiansa na para u fan gana. Buenu! Lau guaha planun programa-mu ni siña ta analisa, tumaitai yan kumomprende kau kombeni para i publiku? Un` komprende na tinahuñg ni “biba” este na biahe? Lagnos haf` planumu ya ta ñgañgas estake mamtu`!

•••

Sige amiguhu Magoo ha ketuñgu` haf` gaige gi uttimu na pahinan linala`ña. Los uttimu ha baba ya ha eñgulu`. Ilegña, “Tapbla!” Era ha soda` na `nai madispone matai popble i amiguhu. Hu abisa na yangin guaha suetten maseha haye na prohimu debi u fattu gi idat 30 años. `An taya` sumugu`, aksepta na esta`i finataita puru sufa`!