Estorian Marianas, Estoriata

Mauleg na intension lau guaha chinatsagaghu gi pinegan tinige’ un’ marineru haf’ linie’ña guine. Seguru na ti baluchu si pindehu ‘nai sige mañgge’ pot natibu? Haf’ taimanu tuñgohu na añgokuyon i tinige’ña? Kau magahet na ha komprende kutturan yan tradision tanu’?

I puntu: Guaha man-antau yan tatkilu’ edukasion niha na tautau-ta siha. Haf’ na ti siña siha u tinige’ haf’ estoriata? Dañkulu na difirensia kinemprenden unu ni ti tautau-ta gi este na pinetsige. Mas antau yangin enfin hita mismu tumuge’ i estoria-ta.

Muñga mañonge

Sessu si Guelon Fadañg ha apagat hit na muñga man-mañoñge gi halom tanu. Yangin un kontradise ennau na abisu, siña ha’ mana’ dinalalag, malañgu ‘sino hinetdan hau.

Guaha siha sumusede mana’ dinalalag. Yangin un’ estotba i lugat guelu siña mana’ dinalalag hau para iya hamyu dispues de un’ diñgu ayu na halom tanu’. Guaha u fañiente na gai kompania hau gi finatomu tatte ginen i chagu’.

Pagu ‘an un’ disatentuye i lugat, siña ha’ mana’ malañgu hau. Deb i un’ makoni’e suruhanu para u danche amanu sessu ‘nai man-estotba hau. Prontu, debi un’ fan gagau dispensasion.

Yangin mana’ hinetdan hau, pues guiya este uttimu eskaleran mana’ malañgu ‘nai ti amtiyun chetnotmu. Ti satbayun i chenotmu ni un’ ma-agañge suruhanu.
Guaha lokue kasadules man-hasuette. Maseha papa’ dotse ha kone’ ha’ dañkulun ayuyu. Guahu unu hu tuñgu’ na ti bai’ mana malañgu lau ni unabes ‘nai mana’eyu’ teñguañghu para tatte giya hame. Kulan ha’ yu’ si kara’!

Diariu na bisiu

Kada unu gai bisiu ni ha chochogue diariu. Pot ihemplu: Yahu mañge’ asuntu siha. Guaha mapot yan ti mapot. Enfin, hu tuge’ hafa gaige gi hinasoghu. Ti hu ekspepekta na in’ fan konfotme lau estaya ta pañgun fina’ konbetsasion.

Asuntun bisiu ha kone’yu’ tatte gi tutuhon politika guine. Guaha ‘nai hu pega kumu huegun bola. Bula man-e’ega’ piot ‘an Dameñgu deste famaguon esta man-amku’. I buleru (team) ni hu dadalalag era i territorio’. I mapedi ha’ gi kada huegu. Gigon ha chule’ i di’u duru man-magap i man-e’ega’ sa para umapedi talu i territorio’.

Kontodu i tumatitiye i otru team (papula) man-madalalag ham pot mina’ase’. Gigon magpu’ ya marimata ta’lu i teamhu, dimas de u guaha layu’ duru i chaleg. Tantu de man-mapedi i buleron mame, esta man-eyag mauleg na sensian pedi. Guaha lokue’ ni hu faisen maisayu’ kau ti matuñgu man-bola na mafa’ bisiu mapedi? Ai, lau achog man-pedi esta kontra grasia ke inalayu’.

Eskomen Mai’es

Hu lie’ un’ lusuñg gi hiyoñg gima’ un’ cheluhu. Gaige lokue’ gi un’ banda mitate yan manu. Hana’ hassuyu’ un’ tiempu ‘nai umeskome mai’es i amku’. Gai buruka na cho’chu’.

Finenina un’ gugan i mai’se, dispues mapega gi bariles, mana’ye hanom yan afog ya masumai. ‘Nos kuantos dias dispues, malagnos i mai’es ya mahinagua ya maguleg gi hilu’ mitate ni manu.

I usun lusuñg kase lamayot patte gaige gi lomug amut antigu. Entre ennau yan malomug baba’, suni yan lemai para sentadan familia. Sumen makat yan mahetug na achu’. ‘An un’ soda’ gi fina’ halom tanu’, muñga humasupak mumueba gi sagaña sa’ un’ mana’ hinetdan.

Finaposta

Dispues de monhayan sumulu’ ayuyu, ha birague i prohimu para i kareta. Mauleg ha pokate para u kesuda’ i tumobit. Ha soda’ dispues de dos oras. Mamatkilu. Gi kinekiyuñg para i señgsoñg ha sañgan na mana’ abag-gue’. Tat ti fugu gi man-gachouñg. Ni unu esta malagu’ dumalag sumulu’. De dios!

Kada umasoda’ham gi fina’ gupot antes, ha plantaye-yu’ man-pairen chesa deste katdun patas guaka, fritada, katdun pechu, kelaguen higadun guaka, kelaguen mundoñgu yan inasnen tukun atulai yan tiau. Kada lokue’ ha pega, ilegña, “Guiya este primu i chesan hari-ap (hurry up)”. Magahet na man-sen paire na chesa ni humuchum lamayot patte gi gigat korasonmu ya un’ hassu ambientomu ‘nai esta atrasau.

Masañgane i prohimu na kanset gofesña ya mauleg na u para chumupa. Dispues de kanset? Sotta ya u gosague’ i prohimu sa’ haye mas tumuñgu’ ke guiya mismu?

****

John DelRosario Jr. is a former publisher of the Saipan Tribune and a former secretary of the Department of Public Lands.