Geneftau Sensian Karidat

Gi maseha haf` na mattiru `sino chinatsaga i tradision relihion-ta fitme na pogse` karidat ni sumustene natibu deste antigu na tiempu. Huli`e gineftau tautau-ta ni muna` ma`aggem-yu` gi halom rimulinon chinatsaga. Onrau na sahyan kuttura-ta ni mibendision katma yan trañkilida.

Patte gi kustumbre-ta i assistimienton gi dos saina piot `nai man-malañgu. Mauleg para i matriatkan yan patriatkan familia kontodu i famaguon ni sumakrifisia siha pot mañainan niha.

Hu mente este pot huli`e sanlagu pinadesen dos amko` ni mapega gi fina` guma` `sino fasilidat `nai haf` tetehnan gi guinahan niha ma-usa para apas. Ayu `nai manmafattu famaguon niha dispues de madispone sainan niha. Dañkulu i difirensia gi entalu` dos kuttura.

Huli`e lokue` finatai un` biha ni umahnanau ti umasagua. Gi `nai umagoninias ayu ha` ilelegña ni umatiende-gue`, “Si Yuus Maase`!” Ha repite este na fino`ña estake machum mataña. Mit grasias para i parentela siha ni umasiste ayu na amko` estake mapega gi sagaña.

Mit grasias para todu i umekstende kanai niha ayudu para i man-malañgu, man-chatsaga yan te`ug na mattirun pinepble yan otru siha assistimientu. Megai para un` rikohe na regalu fuera de satisfichu na siñiente pot gineftau korason-mu.

Risakin Destrosiu

Guaha masusesede ni malolofan gi papa` guieñg-ta diariu. Kulan manmama` i taguan hit `nai to sotta papa-ta no siakassu. I mamamaila` parehu yan loglug guafen botkan ni siempre un` dia seguru na ha destrosia hit.

Yangin in` ekuñgog i mafanana`an ni man-amko` “chechop linala`” siempre in` li`e na diariu sige mas uma`gañg i burukan achu` guafe taduñg gi papa` tanu`. Yangin un` dia u pagpag ennau na botkan tat ti u destrosia guine.

I guafe ni husasañgan ti ayu i mañiñila`. Gaige este gi hechuran disposision un` grupon bisnis guine ginen hiyuñg ni adumididi` sige ha choneg planuña para tafan mafa` esklabu gi karera mona. Para u emplea kasi 2,000 na tautau-ta. Nahoñg na numeru para u dikta kinalamten sisteman gobietnu guine.

Lache este na intension. Gi papa` sisteman demokrasia gaige fuetsan disposision linahyan gi tautau. Hita `nai gaige ennau na direchu. Ahe` ti para tasede ginen hiyuñg na kometsiante mandispone guine `nai para manman-osge ha` nina` siñata kulan galagun chalan.

Sensian Menhalom

I sensian minenhalom sumede hit pumula` ensegidas haf` na mañan tautau gaige gi menata. Ti mapot na dibina sa` kinihaye ni mañaña sin ditension. Libianu tali`e` kau pitbetsu, presonidu, fagahot, saguat, tramposu, amtau, kabilosu, makatrefi, kabron, su`anu, luhuriosu, tarugu, malagradesidu, tattamudu, dotmiladu, tomtum, mahatot, manatma, pat chapuseru.

Hu saulag tupag este na midision gi dinagau `nos kuantos kuestion. Gigon ha aka` i katnada hu hala halom esta i lagua`hu. Ayu `nai hu abirigua gi malago`hu.

Mina` hu mente este na asuntu pot umasoda`yu` yan un` hobensitu ni motmut respetu, tomtum, yan su`anu inepeña gi kuestion-hu siha. Hana` ma`aggem siñienteg-hu pot hasan huli`e sumen respetau na patgon na tiempu. Ti todu kinalamteña ha espepehos haf` kinalamten halom gima niha. Mahayu fitme deste bittun respetu yan tradision tanu`.

Ni un` patgon mafañagu yan paketin kinemprende haf` che`chu` tautau. Debi u fan mafanague ni mañainan niha. Este na patte `nai humalom i dos saina sin ditension kumu siha primet maestron famaguon niha gi halom guma`.

Deste liñguahe yan kuttura siha man-responsapble gi todu finana`gue. Yangin ti un` petsige fehman este na responsapblidat pues un` sede famaguon man-lachog kulan dineku` sakaten kabayu gi katkuet lugat.

I halom guma` yan hafa un` impatta mauleg gi patgon `nai gaige hatdin familia-mu. Ni haye na menhalom siempre ensegidas hali`e haf` pinayon patgon-mu dispues de ha diñgu i pettan sanmena. Na`e animu pot futtunan niha.

Linala` Un` Biyinariu

Mafaisen untat George Koch, un` biyinariu ginen New York, haf` na felis todu bisnis familiaña ni tinituhon tataña. Ti mapot na ineppe hasañgane i gaseteru: “Chogue nina` siñamu gi haf` `nai mas mauleg hau na offisiu”.

Ha esplika na i sensian integredat prumohibegue` che`chu` chapuseru pot ambeteria. I hinimidde umestablese na ti todu ha tuñgu`. Poresu na man-empleha ni tumuñgu haf` mas `nai siña ma-adelanta produktu siha para todus gi enteru metkau gi tanu`. Gi idat 75 años ni unabes `nai mattu hinassoña dumeskansa. “Mientras mas mamatinas-yu` salape` mas megai na ayudu para i mas man-namase` siha gi todo patte gi tanu`.”

Dañkkulu na leksion gi modun mañaña pot finatinas fiñkas `nos pot para guiya lau para i man-namase` siha entalu` iya Africa yan otru patte siha gi enteru i tanu`. I felis na finaposña gaige ha` giya guiya fitme na sensian integredat, hinimidde yan yine`ase` gi ti muna` siña giya siha namaisa. Para i kantidan salape`ña libianu masetbe gi katkuet manera. Lau humuyuñg macho`chu` diariu pot alibiun ha`anen mas man-namase`. Geftau na sensian kilisyanu.

Tinituhon Popble

Un` lemlem tautau hu konsidedera finatton un` familia ni dumiñgu chagu` tanu` niha pot inaligau mas mauleg na appottunidat para famaguon niha.

Kumu ginen este yan man-apapase-yu` aduana (tax) libianu bai` buruka na debi u bira siha tatte gi tanu` niha. Dos yu` chumoma`:

•I konsensiag-hu sa` hu komprende finu` i Saina para tana` fan geftau hit gi man-namase`.

•Ginen un` popblen guma`yu` lokue` `nai dumañkulu.

Ensegidas huli`e finapos-hu gi fina` espehos. Megai `nai in` fagcha`e ni mona ni tatte. Ha rikohe ham si nanan mame gi fina` tinayuyot ` lisayu kada pueñge. Dispues `nai umanog fina` ayudu siha ginen mañeluña.

Ayu na finapos mame fuetsau man-eyag ham man-macho`chu` `nai in` agradese balin i dididi` na moneda ni in` presenta gi mañainan mame. Hana` fan unestu yan humidde mañan todus gi makat na mattiru siha. Dimas de bai fan gasta otguyu gi ayu na familia mas pas siñienteg-hu gi fehman na tinayuyot ya u soda` lokue` ginefsagan niha para mona.

Na fan geftau hamyu gi prohimu ni numesessita ayudu-mu. Si Iku.