Hinanau Sakan 2015

Gi hiniyuñg este na sakan tana`e mit grasias i Saina pot todu bendision-ta. Puede hana`e hit minetgot yan minesñgon-ta para ta aregla ha`anita gi nuebu na sakan. Mampos abarambau finapos-ta na biahe mina presisu na tafan daña ya hita ta aregla futtuna-ta.

Naturat ta abiba dinaña familia `nai ta limienda tatte i pegsi` mañge` yan ma`ug na amesta. Maseha gi hilu` dididi` na tininon katne lau estaya ta pega mona inatisan inafamauleg gi entre membron familia. Este na dinaña` si nana yan tata umestablese yan sumimientu gi halom famaguon niha. Mauleg na tradision familian natibu.

Gi halom dinaña `nai tali`e mañaina-ta na esta man-tufai lau gagaige ha` ayu na chaleg i kumonfitma satton na dinisehan niha na u felis todu haf` ta petsisige. Este na diniseha fitme giya siha esta i uttimu. Huñgan, i anaku` lokue` na finaposta hana` la anchu pinasensia yan hinimidde-ta. Kumeke ileghu esta man-ginen ayu hit na hogsu`.

Asunton 2016
Guaha siha `nos kuantos problema-ta gi hinalom nuebu na sakan. Makat na asuntu pot rason na todu numesessita dañkulu na fondu gi satbasion operasion gobietnu. Siempre umachalapon i chinatsaga guatu gi kinalamten familia.

`An tana` fan daña obligasion yan dibi `nai mas klaru kuantu tinahoñgña hinanau 2016. I mapega kumu moneda para este na sakan ennau i $145 miyon pesus. Na suha 80 pot sientu para sueddon empleau yan 25 pot sientu para i PSS. Taya` sopbla para otru obigasion siha.

I mafanana`an “unfunded liability” (dibin gobietnu gi programan man-ritirau) ennau i $789 miyon pesus. Na pinalo`pu` ni mas ke $30 miyon dibin gobietnu gi CUC, dibin CUC gi CDA $50 miyon pesus, $45 miyon pesus para pagamientun man-rirtirau yan otru siha obligasion.

Haf` na kada ratu hu tuka este? Ti umahñau na `nai apenas fondu siempre ha luñu` operasion gobietnu. Este na chinatsaga ti umahñau siempre ha palala`e todu piot i kualidat linala` gi kada famiia gi señgsoñg siha. Estague` dañkulu chathinassog-hu ya puede i man-sabiun I Deni man-preparau para uma-adelanta ekonomian i tanu` ensegidas.

Tafan Magof Todus
Lamona gi misan gayu siempre ta kanta (gi mañgiñge` Niño) Tafan Magof Todus. Man-adiseha hit dinuebu gi hinalom sakan 2016! Bonitu na kanta ni kumonfitma sensian inafamauleg gi entalo` todu.

Gi mismu sunidu ta gagau i Saina yine`ase`, tana`e bendision i manhanau yan ayu lokue` seha kassu man-matai gi nuebu na sakan. Dispues, man-esalau ta`lu tafan magof todus! Esta na`fugu na sunidu. Guaha esta nina` fantutuhu` lagu` niha. Tafan man-gagau lokue` minesñgon-ta para maseha haf` na mattiru.

Dispues de misa, kase guaha para dinaña` familia `sino man-atuñgu`. Gi katkuet okasion, yangin guaha usun maneska na seguru na guaha para un` sinegune ni karetamu tatte giya hamyu. Bula siempre usun maneska `nai i man-bastus libianu che`chu` bulacheru gi chalan publiku.

Agradesimientu
Tanana`e lokue` mit grasias ayu siha na bisnis i man-manna`e ayudu para i mas man-chatsaga na tautau-ta. Hana`e minagof, piot famaguon niha, umabiba finatton i Niño pa`gu na Noche Buena giya siha. Felis Noche Buena!

Hu dimemoria pinepble kulan tatten patman kanaihu. Ennau na chalan `nai malofan-yu` antes gi pinatgon-hu. Lau esta namanman na tatfoi dinidog man-taya` mame, mañgontentu ham ni haf` guaha yan motmut minagof gi halom todu mattiru. Ni unu sumeha!

Dañkulu na sapet pumalo`pu` Saipan guihe na tiempu gi tutuhon 1960 na sakan. Guiya este hiniyuñg Navy guine. I tinilaika mampos na aminasu deste cho`chu` esta tatte gi gualu`. Dios mihu na mattirun familia.

Pot Chaleg
Estague` na tiempu `nai namase` i man-daibites sa` ti man-obra sumumuke siha. Guaha ha` bumatbaruye lau dispues makone` para i hospitat sa` abarambau todu sistemaña ni manadan asiga, asukat yan mantika. Dios mihu!

Huli`e` todu klasen gupot entalu` Amerikanu, Chinu, Koreanu, Japones yan gi fina` isla. Tai atparehu gipot Chamorro. Paire sentadaña. Todu i chumage mañgonfotme na paire! Kasi i sentada-ta lokue` umatitisa i mafanana`an chetnot familia—daibites.

Mampos mi-asidu sentada-ta. Estague` umaminasa parahiya-ta. Gigon fatsu, man-sulun hit halom gi chetnot daibites. I para ta korihe sumuhaye daibites dañkulu na sakrifisiu debi ta chogue sin ditension. Gaige i kustumbren sentada ni debi tatulaika. Sin este pues siempre gigon tagacha` kuarenta (40) años esta hit man-listu man-marelistra gi butai` daibites.

I tinilaika gi sentada-ta siña ta tutuhon adumididi`. Mauleg ta tutuhon gi malimitten kantidan neñkanu` ni takakanu`. Pega ennau gi sisienta pot sientu (60%) yas un` sede estomagumu kalamten regulatmiente. Este na inadahe mas libianu yan homlu` sa` tita estotba fuñgsion parahiya-ta.

•••

Mattu un` oga`an Dameñgo si nanan mame ya ma-maisen kau manhosme misa ham. Ineppe ni un` chetluhu, “Hu manau-yu` para i gima Yuus gi oran `las tres gi chatanmag ya mahuhuchum”. Diberas `nai ha hakot i biha i tegpuñg eskoba ha chalapon ham todu. Tatnai mauleg ineppen pitbetserias. Dios mihu!