Futuron famaguon natibo

Gi kada diskuido, mutiplika ennao na chinatsaga yan tres años na dinitene gi manmauleg siha na attikulo `nai siña ta adelanta haanen taotaota.

Buente mampos hit ni politikan imbidiosu na memegaiña besis `nai manmalefa hit nu i obligasion publiko ni manma-entrega hit gi mapos na eleksion siha.

Dimas mohon de sige tana` fan atotpe sensian haye paire, ta abiba i hafa propio yan dinanche gi areglon asunton linahyan para i taotaota. Sige hit mankonkurahe estake ha gacha` hit indukto i diskuiduta siha.

Rason na sesso hu bisita este na asunto pot linahyan sa` `nai tinetpe i publiko didog na chinatsaga, muñgaha` hulo` gi puntan hogsu` i Deni` ume`ensinahyao ayudo. Maseha hafa na ausilio komo siña ha alibia i chinatsagan familia. Lao ni este ti lagse` tumunog gi señgsoñg siha `nai mañgaige i man-ordinario.

Esta na` fatigao este siha na diskuido. Sige hit mangupot gi menan guma` mientras i sake duro ha rikohe i manmauleg na soblan neñkano` siha. `Nai mañgahulo` hit gi chagchaga chatagmag, ta soda` na ha lachai i sake lumofan i ta popolu na putahe siha para amotsata. Atrasao mampos ta repara na debi mohon ta famauleg ennao na soblan neñkano siha kosake siña ta sosoda` dispues.
****

Mangaige hit pago gi kanton i fondun palañgana ni hagas sume`. Ni haf` ya tachogue ti ta presetba i tetehnan na soblan hanom gi fondu.
Gi fino` un` amko`, i taotao munana` sahñge `nai tiempon abundansia ti `nai finagchae` hinalom tiempon eskases.

Fehman na diniseha giya guaho na u guaha mas inadahe para mona. I huegon politika temporario mampos para i guaguan na tiempo ni ta dispetdisia sin presiso. Ya repara sa` este siha na diskuido ti ume`erayan politika sa` `nai chatsaga i tano`, memegaiña gi taotaota manmamadese sin presiso de hemunos de rayan pattida.
****

Matuka este na asunton pot abortion–mapuno neni gi halom tiyan nanaña–guine gi alacha.
Uno na attikulo umestototbayo`: Yangin pot siakasso maestane un` palaoan ni mafananaan` rapist, haye para u dinetetmina kao debi u katga i prohima patgon kriminat pot nuebe mesis na tiempo `nai gaige na maprereso? Kao manlisto hit umapagaye gaston ennao na nana `nai ta afuetsas kumatga yan fumañago ennao na patgon?

Ilegho na ti presiso na u guaha diniskontento gi este na dibate ya buente dinancheña yangin ta fanague famaguonta hafa sustansian checho` kasamiento. Este na asunto piot ya mabendise i dos asagua gi menan i atat, mas mauleg para hinanao niha gi karera mona. Estegue` na rason na komprendiyon i makat na kuestion siha ginen i famaguonta pot asunton checho` kasamiento. Lao debi ta oppe i famaguonta nu i dinanche na finana`gue siha pot hafa sustansian este na asunto: Pisun ma-establesen familia!

Teug` i asunto ya komprendiyon na makat ta oppe` asunto siha ni mampos petsonat `nai gi mismo tiempo ni hita mismo tita komprende añgaian na tiempo `nai siña mapuno` un` innosiente na neni gi halom tiyan nanaña.
Mauleg ta diskute este gi entre hita ni mañgilisyano puede u guaha mas inakomprende hafa sustansiaña linala` un` inosiente `nai ginacha` indukto i familia gi un` disision ni siha mismo siña sumede.

Pot mampos teug` i asunto ya finagchae` mas kalu i konsiensian manhoben siha na tiempo mina` sumen presiso na hita nu i mañaina debi ta adiñgane famaguonta na este i checho` kasamiento ti huego. Seriosu na asunto komo pisun ma-establesen mabendise na familia. Hahasso este gi konbetsasion miyo gi oran amotsa yan sena. Si Yuus Maase`!