Mas ma`te tipu` Marianas

I Asunto: Mampos keha i poduñg rinikohen kontribusion tax para i kahan iya Marianas.

I Opiñion: Baba na señat para i publiko entalo` pago yan siñko años na tiempo guine.

Ti namatman `nai sige pago i kabesanten Marianas de man-asogne pot chinatsaga ni finañago nu i poduñg rinikohen kontribusion tax.

Sige man-asogne na yangin mohon ti Luta yan Tinian ni mampos magulusune i tetehnan na $7-9 miyon pesos para pago na sakan.

Lache este na atetu sa` guaha disi-sdais (16) na representante yan tres na senadot rumepresesenta iya Saipan gi lehislatura.

Gi mismo tiempo, ta pega gi rayan piligro i haanen manmarefere na man-malañgo siha gi hospitat Hawaii pot ti siña ta apase kuentata.

Dañkulo lokue` na kuenta ti man-ma-apapase deste tres administrasion tatte. Todo kinalamten pago, mau`udai gi hilo` dibi. Mafananaan` este “deficit spending” `nai mofona ta gagasta salape` publiko antes de u guaha kabales na rinikohen kontribusion tax.

Lastima i otdin gobietno pot “austerity” (inadahe gi todo gasto) sa` memegaiña dumis-attende ayo na otdin. Megai esta pago man-gugpot kulan mohon kada dia haanen noche buena.

Haye para u famadese nu este siha na dispetdisio yan diskuido gi chat-uson salape` taxpayers siha? I publiko hinerat deste sankatan na islas siha esta iya Luta.

I resuttan este siha na diskuido ti umahñao, siempre ha fañague hit `nai mas tumunog i kantidan fondun publiko ni ta u`usa para setbisio siha. Sumen na`triste sa` todo i tiempo tatatte i sinetsot pot diskuido, tatnai talie` na guaha satton na inadahe gi disposision kontribusion manman-apapase tax.

Ilegña i man-amko` na i taotao munana` sahñge gi tiempon abundansia ti `nai esta taya` para ta puluye para `an ha fatoigue hit un` didog na gotpe. Puede i timoneron iya Marianas maripara na hagas magpo` i fiestan diskuido. Si Yuus Maase` yan ghilisow!