Baratun Suetdu

I baratun suetdu i primera kehan empleau siha guine. Estague` i dichu asuntu pot gaige tutuhun usuña gi halum guma` familia.

Hagas problema ni guaha `nai mapañgun kadu` nuebu na asuntu. Mana` bula talañgata offresimientu. Lau taya` adelantu gi monedan familia! Teñga tasañgane haye na fulanu “halulaye” (mona_. Lau guine na biahe halulaye tatte!

Puntu: Homlu` na ekonomia siña fumañagu fondu para setbisiu yan suetdun empleau siha. Sin este, puru dinage mahasñgun gi publiku. Mauleg este? Sin fondu taimanu guaha katsun setbisiu yan offisiu?

Planu?
Gi mismu tiempu i dichu kuestion: kau guaha planu para uma-adelanta este na asuntu yan para ñgai`an? Ti menus ke $750 miyon pesus gi sakan ha nesessita este na asuntu.

Kase guaha 15-mit na empleau gumagana suetdun popble mina` seriosu i asuntu ni lumuluñu` kinalamten halum guma` familia.

Komprendiyun i keha ni sessu oppan. Ti u kahulu` i asuntu `an sufisiente moneda. Lau sapet mina` oppan keha ginen i tautau siha.

Asuntun halum guma` familia i sentru asuntu gi este na kehan tautau-ta. Kumu saina hu komprende i makat na hinanau familia gi bandan nesessidat piot `nai sessu mapune asuntu pot mantai moneda para presisu siha na attikulu.

Diariu na iniguñg ginen famaguon-ta gi todu asuntun niha. Gi hilu` este na pinadese, propiu ta ketuñgu` manu `nai gaige pisun suetdun popble yan kau siña ma-adelanta?

I asuntu satbayun lau dañkulu na sakrifisiu ha nesessita para ta komple mas amtau na suetdun empleau siha. Ha nesessita homlu` na ekonomia `nai mas megai fondun kinalamten yan cho`chu` para todus. Mau`udai este gi estudiau na planun ekonomia ni debi ta petsige.

Mañiñila` kandet gi gima` lau kau guaha tautau?

Tinayuyot
Gi halum ira `sino fina` gotpe sin ditension tagagau i Saina bendision yan ayudu. Namahof i metgut na inañgoghu gi Saina.

Rinikonosen linala` espirituat konfitmasion na un` tuñgu yan komprende haye yan hafa Si Yuus. Guiya solu fitme na luseru gi ha`animu ni taimanu na estotbu un` finatoigue. Bendision pas yan katma gaige gi Saina.

Siempre u katma i napu dispues `nai sinede hau mamatinas suanu yan amtau na disposision. Pot mantautau hit na debi tafañeha para tali`e hinanau-ta gi halum barañka na katsadan lina`la`. Ti u lache ginagaumu gi Saina.

Ina`ayuda
Mansuette hit na metgut kutturan ina`ayuda gi familia siha. Estague` kumatsu ha`anita gi halum didog na chinatsaga. Mit grasias na mangeftau lokue` i tautauta gi dichu nesessidat.

Megai besis `nai triste sentimentog-hu `an hu konsidera i makat na chanda gi ha`anen familia siha guine pot tinahuñg chigu`an. Hu komprende satbasionta gi hilu` kutturan ina`ayuda. Satbasion natibu este na modun linala` deste antigu na tiempu—ina`ayuda! Konsidera `an tirun konsu kuat hinanau-ta diariu.

Klima
Deste hinalum tiempun uchan kulan hahoñgañg hit i manadan granu ginen i mapagahes iya paraisu. Benefisiosu pot mañahguan ta`lu tañkeghu hanum yan betde i cha`guan siha gi oriyan guma`.

Disbintaha para i fangualu`an `an inipus na hanum kontra tinanum siha. Lau mapayune finattun este na tiempu mina` ti man-inaminasa ha`anen niha. Maprekura manu ha` `nai kayadan ñaihon i tetin uchan.

Para i talayeru dididi` fotgun lau fresku mas i kantun unai mientras mayoyotte talayan niha. Gi hilu` pinasensia siempre u fan mañgone` para pattun na inaflitu yan kelaguen para i lamasan sena. Mientras ti tumalag mamage fina` mañglu` paire i ha`ane!

Mehnalum
Kada tautau mana`e sensian mehnalum. Un` Bittot (virtue) ni gaige giya hagu silensiu gi taduñg na patte gi konsensia-mu.

Metgut na bittot ni sumede amtau na inadahe yan disposision gi ha`animu. Hana` fan safu hit ginen ti kombidau na diskuidu yan tinailaye siha.

Kumu saina, libianu un` siente `an gai asuntu patgonmu gi chagu` na tanu`. Siempre un` agañg para un` konfitma na felis ha`aniña. Dispues de un` uga gi hilu` grasiosu na konbetsasion `nai un` soda` haf` sessu asuntoña.

`An guaha hihot na parientes para umadispone guaha `nai mana` fañiente hau pot uttimu despedida. Gi man-mofona ni munesessita orasion siempre un` mabisita gi hechuran guinefe `sino metgut gi hinassomu i prohimu. Orasion!

Mabisita
Guaha `nai mabisita hit ni man-mofona na che`lu, parentela `sino atuñgu` layeye pot orasion. I modun bisita entre finatoigue hau `sino metgut mampus gi hinassomu i prohimu. Tana-iye misa yan orasion pot yine`ase`.

I sensian mehnalum otru koyentura `nai siña hau mana`fañiente. Tatnai hu ñega este na ginagau pot esta ti manparehu hit yan siha. Obligasionta humassu siha gi hechuran orasion yan misa. Haf` mauleg un` chogue para i prohimu siempre u na`lu tatte ya ti umahñau.

Hu tuñgu` kumu mabisitayu` ni mañainahu `sino mañeluhu. Un` ti maput na tinayuyot dispues `nai hu kontinua ha`anihu. Hu repite ta`lu antes de bai deskansa `an pueñge. Todu i tiempu mauleg deskansog-hu.

John S. Del Rosario Jr. | Contributing Author
John DelRosario Jr. is a former publisher of the Saipan Tribune and a former secretary of the Department of Public Lands.
Disclaimer: Comments are moderated. They will not appear immediately or even on the same day. Comments should be related to the topic. Off-topic comments would be deleted. Profanities are not allowed. Comments that are potentially libelous, inflammatory, or slanderous would be deleted.