Estorian tautauta

Guaha `nai in` hiñgog pot “misteriun tres?” Ha tutuhungue` gi as Yuus Tata, Lahiña yan Espiritu Santo. `An matai unu, tinatiye ni dos—tres. Marimatan kampanan Guma` Yuus, tres. Ha`ane: oga`an, taloane yan pupueñge, tres. Sinantusan na familia: San Jose, Santa Maria yan Jesus, tres. Lumala` ta`lu si Jesukristo gi mina` tres dias. Misteriun Tres!

•••

Geftau i natibu gi haf` suetteña (inana`e `sino “sharing” gi finu` Eñglis). Un` pogse` kutturan tanu` ni sumen ma`ug. Estague` na kustumbre muna fitme mas inaglofli`e gi natibu. Ha soyu` ina`ayuda entalu` todu desde mamunu` ga`ga, peska, che`chu` familia yan komunida. Gaige guine i fitme na haligen yan pisun tautau-ta.

•••

Dos offisiu sessu anog gi disision i Saina `nai ha ayeg i dose na man-apostolesña: peska yan fangualu`an. Tiha ayeg ginen man-riku `sino man-malate` soluke offisiun tanu` yan tasi. Haf` moralidat este na disisioña? Na ti pot hinimidi gi che`chu` i Saina?

Atan lokue` sa` i tanu` yan tasi i pisun mantension prebinsion familia. Ha esgaihon halum hinimiddi gi korasonta piot dispues de todu dia gi papa` somnag, hatdin yan tasi. Ha sede lancheru yan peskadot mamatinas planu haf` para u chogue diariu.

•••

Tanu` natibu ti tulaikayon estoriaña. Gi hilu este na rekueddun i Saina `nai matutuhun inestablesen familia gi señgsoñg siha. Sumaunau otru siha adelantu kontodu kuttura, linala` tradision gualu`, relihion yan liñguahe.

I inai este na petlas siha `nai man-mafañagu hit. Masustene ni mañainata para i manatatte. Estague` mina` chettun fehman sentimentota gi tanu` `nai man-dañkulu hit gi hechuran guma` familia.

Establesau na lugat-ta. Diariu tafalague kau finagpu` eskuela, cho`chu`, yan otru siha aktibidat. Siña mohon mabenefisia ni man-amko`ta lau magu`ot pot hita ni manatatte. Gaige futtuna-ta gi amtau na sensian niha.

•••

Oppan kuentos na humalum i atulai gi sagua`. Man-adulalag i tautau para i Chiko man-etupag. Ti huhulat manadan tautau, pisau, kutdet yan haguet gi pantalan.

Guaha ha` lokue` ayu i faye ni mattu sin pisau. Lau ha kikilili` tarun finadeni`. Dispues de umesuette gi todu man-e`etupag, haspog. Ma`pus para iya siha nahuñg kinano`ña kelaguen atulai ni kineni` otru. Faye!

•••

Antes, gigon mahala i chenchulun atulai mabatsala halum gi inai. Dispues man-mapatte i mangaige na tautau-ta kulan kustumbre gi fina` suette. I tetehnan machule` ya mana` fan mañage i bisinu. Matulaika este na kustumbre. Pa`gu mapunu pesu yan libra de hemunos de kustumbre. Tinilaika!

•••

Maplanta kafe yan fina` mames para mirienda gi fina` bela antes de lisayun `las dose . Pa`gu, puru neñkanu` regulat man-plantau gi lamasa. Gupot!

•••

Repara sa` lamita gi hutnalerus guine gumagana tagpapa` na sueddu (poverty income level and below). Dichu rason na mauleg ta esgaihon planun man-mananum katsun mantension familia.

Mauleg gi entre semana tafan mananum gi oriyan guma` yan gualu` familia. Ta usune tinanum yan pinegsai. Taya` para u benefisia masahalomta solu hita mismu.

Mas lokue` ha sede hihot na relasion yan kada membron familia. Estague` `nai matanum ni mañaina sensian yine`ase`, ina`ayuda yan gineftau gi entalu` famaguon niha.

•••

I patgon ni mauleg makreansaña gi gima` mauleg lokue` konduktaña maseha u falag manu. Gaige halige yan pisun kreansa gi halum guma`. Na setbe fitme na guaguat gi famaguon pot futunan niha.

•••

Sige un` amiguhu kumanta pot finaposña guine siha na petlas iya Pasifiku. Todu bonitu i sunidu ni ha dopbla. Mattu dispues `nai ilegña, “Gaige mandeskansa gi papa` pution yan mapagahes iya paraisu i mañainahu”. Na`mahalañg dopbladan palabraña.

Era, apmam na tiempu desde ke ha diñgu Saipan ya sumaga sanlagu mas ke sisienta años. Tihu tuñgu` kau ginacha` i prohimu ume`emahlañg pot klaru na ti u birague` mage dispues de humanau tatte gi familiaña America.

•••

Hu ega` hagas mubi (movie) pot geran dos giya Burma. Manadan sindalun Japones man-magu`ot kumu presuneru estake siña manhanau tatte Japon.

Mientras mananañga batkun niha, sige mañganta “No place like home” gi finu` niha. Estague` na kanta machule` ya matugi`e palabras ni mafana`an “Ti Gi Un` Palasyun Riku” as Tun Josen Pangelinan.

Esta na`mahalañg `nai sige sindalu mañganta gi hilu` totnun minahalañg nui tanu` niha dispues de man-manotisia na mapede Japon gi gera.

•••

Antes, huli`e tasahos nuebu na pininu` ga`ga ni maha`me pat matala` gi hilu` sin pot presetbasion. Era, hasan guihe na tiempu mangai ice box ya ayu solu manera `nai ti u lastima totchen familia.

`An manalagu, entre matunu, aflitu pat makadun niyog. Esta na`mahalañg `an sige matunu ni mañge` pauña. Ensegidas ha koneyu` tatte gi na`magof na tiempu `nai sessu man-ayudayu` matasahos entre katnen guaka pat babue.

ShareTweet about this on TwitterShare on Facebook0Share on Google+0Share on LinkedIn0Pin on Pinterest0Share on Tumblr0Email this to someonePrint this page
John S. Del Rosario Jr. | Contributing Author
John DelRosario Jr. is a former publisher of the Saipan Tribune and a former secretary of the Department of Public Lands.

Related Posts

Disclaimer: Comments are moderated. They will not appear immediately or even on the same day. Comments should be related to the topic. Off-topic comments would be deleted. Profanities are not allowed. Comments that are potentially libelous, inflammatory, or slanderous would be deleted.