Gi Lemlem Tautau

Sessu gi lemlem tautau matachoñg-yu` gi baranda umefresku. Umachigu`-yu` pot para bai na katma hinasog-hu. `Nai mas homhum, hu huñgog i uttimu katen paluma siha gi biradan para fina` halum tanu`. I ekun katen niha umesgaihon halum i pueñge.

Umafagcha` yan bonitan minachum atdau gi sanlagu. Ha estira papaña gi uttimu despedidan bien benidu. Maliñgu i lemlem tautau. Finagpu` ha`ane!

Hu dandan dispasiu na sunidun piano mientras hu tataitai gaseta siha ni hu matka gi iyoghu komputa. I attikulu ginen i mas man-afamau na gasetan i globus. Hu ayeg asuntu siha piot i libianu ha affekta hit guine.

Pot ihemplo: Japon manathatsa balin $40 Biyon pesus na industrian casino.. `An ha babague` kuantu mohon para u affekta hit guine? Haf` ya silensiu ha otden tautauña na u fañaga tatte yangin pot huegun casino dimas de u bisita Saipan? Libianu este masusedi gi halum metgot na sentimentun nasionat.

Estague` na asuntu ta upus sin kuestion lau siempre u fatoigue hit sumen dañkulu na kompitensian casino. Mansiña hit yan sumen amtau na ekonomian Japon `an ha utut dañkulu na chalan fondu para iya Marianas?

Kuestion: I kabales na kinemprende gaige gi kuestion ni un` faisen: haf` i intension sino prinepone ni lumalailai gi hinassomu? I man-tomtum matuñgu` este na patte gi ininan asuntu.

Gi ti mapot na eskalera: malago` hau machochu`. Un` tutuhun humusgan maisa haf` na cho`chu` guaha, apas gi ora, benefisiu siha, lugat `nai gaige moseria, kau guaha sahyan-mu, yan haf` kualifikasion-mu para i annunsiau na offisiu.

Gi uttimu besis, dispues de todu kuestion un` oppi, siempre un` famatinas disision kau un` fan applika. Estague` kumeke ileghu kuestion. Guaha mas asuntu manladidog ni numesessita kritikat na ineppin kuestion siha. Lau kumu un` offisiona fumaisen i propiu kuestion siempre un` komprende asunto-mu.

Biblia: I Santa Biblia i mas mauleg na lepblu ni maprinta gi enteru i tanu`. Desde siñku na lepblu ni mana setbi kumu pisu gi matuge` este na lepblu todu pot si Jesukristu.

Ha papañgun dañkulu interes-hu tumaitai tinige` man-estudiau na man-totum haf` gaige gi hinasson niha gi `nos kuantos attikulu hinanau Jesukristo. Gi uttimu besis parehu mapetsisige lau pot sahñge chalan ma-ayeg gi karera.

Namanman haf` na i Saina ha ayeg lancheru yan peskadot kumu disipulu ya ti professot letra. Ha tuñgu` i Saina na i dos tautague kumomprende sustansian planu yan ñgai`an `nai propiu umadiñgan pot tinago`ña. Man-mehnalum maseha ti tatkilu` offisiun niha lau mantomtum gi asuntu siha!

Amesta: I mauleg na relasion yan prohimu-mu guaguaña ke todu salape`mu ni gaige gi bañku. Si Howard Hughes, biyinariu, matai yan kochinuña.

Un` tiuhu ilegña na gai salape`gue` onse miyon pesus gi bañku. Dos mesis dispues madispone. Hu konsidedera kau ha chule` hanau salape`ña?

Gi lamasan San Pedro todu mattu para umahusga parehu galun. Solu satbasion-mu i mauleg bidamu. Taya` pot fiñkas yan sinsiyu!

Klima: Tihu tuñgu` kau finatton fañomnagan pat fañuchanan. Atmariau i kliman i tanu`. Kulan sessu bumendabat i mañglu` na tiempu. Esta ti umesgin hahaya na ginen lagu. Abarambau!

`Nai hu huñgog teti i ichan hu falague kusinan sanhiyuñg para bai ekuñgog bailan uchan gi hilu` sin. Paire! Esta man-a`atotpe i granun uchan antes de u fan milag papa`. Fresku magahet i hinanau lemlem tautau.

Guiya ayu na sunidun uchan i hagas muna` mamafoñg maigo-hu` gi hagas guma` gi Lali Fo`. Adahe `an pañgpañg guinaifen mañglu` mattiempu. In` chili` pidasun tapbla ya duru ham pa`gu man-suberu` gi plasan eskuela. Adahe na fachi` in` gimen lau ni unu sumeha!

In` asegura na añglu` i hayun i feggun antes de oran deskansu. Taftaf inna` masa amotsan oga`an diariu antes de misan mona. Mauleg hinanau mame yan famaguon bisinu siha guihe na tiempu.

I mas makat na malabidan mame i in` saki chipan man-amku` para usun chichipopo` gi kareran Guma` Yuus. Un` biahe in` chage sigariyun patma—chupan tinanum man-amku. Kanaha` ti in` fatinas para i sakristia `nai hana` fan bulachun aguayenti ham. Che`chu` pitbetserias!

Hinemlu`: I manehanten CHC ilelegña na para u chule` tatte i pharmacy (lugat mandispachan amot) primera besis pot ayudu gi mamopble na man-malañgu.

Kualifikau i CHC gi un` programan federat ni prumebeniniye fondu para ayudun mamopble piot gi bandan amot. Tai pudet i PHI nu este na modun ayudu.

Ha rimata i manehante `nos kuantos kuestion pot este na planu: kau guaha fondu para este na pinetsige yan kau ti umatompu` seriosamiente `nai mamadesi i man-malañgu. Debi intaktu na planu yangin enfin para umakonsige.

Magahet na puti gi pepble maletke mana`e amot pot ti siña ha apase. Uttimoña mas malañgu i prohimu ke u homlu`. Estague` na patte makeke aregla ni manehante.

•••

Doble: Duru un` palao`an kumate pot tiha hoñge na para u finababa ni asaguaña. Ineppi ni primet asagua ni ha fafana`, “Na tiha yute`yu` pot hagu!” Finu` defuntu tata-hu “true story!”

John S. Del Rosario Jr. | Contributing Author
John DelRosario Jr. is a former publisher of the Saipan Tribune and a former secretary of the Department of Public Lands.

Related Posts

Disclaimer: Comments are moderated. They will not appear immediately or even on the same day. Comments should be related to the topic. Off-topic comments would be deleted. Profanities are not allowed. Comments that are potentially libelous, inflammatory, or slanderous would be deleted.