Gueku na promesa

`Nai un` atrebi hau humatme siyan publiku un` supone, sin un` komprende kabales, haf` primera rason na un` hagu` ennau na offisiu.

Haf` na balukan machaleg hau gi halum tropa sige umesuette asuntu kadu` guaha un` chochogue.

Gi hilu` este, mauleg pa`gu ta sensura manu chimu para un` adelanta kinalamten familia fumana` diariu na mattiru siha guine.

Pot mas ke benti (20) años masimientu i sueddu `nai taya` hatsada. Lau presiun nesessidat sige ha` hulu`. Manu gi halum este na mattiru `nai numa`halum hau ausiliu para i familia siha gi señgsoñg?

Yangin yomug seru repotkatmu haf` na un` sedi ennau na diskuidu? Kau lamayot patte pot ti un` komprendi i asuntu? Manu gi asuntun ekonomia ti un` komprendi fuera de un` kepunu` gueku na “biba?”

Sin ayudu ginen hagu para i mas ke 13,000 ni gumagana sueddun popble kau magahet na un` miresi mabota ta`lu? I asuntu sustansiau! Kau un` letke pot ma`añau hau pot inipus komplikau? Malag manu ofresimientun ayudu gi halum tetmino-mu dos años?

Na ti magahet na in` subi sueddun miyu pot mas ke 50 pot sientu?

Pinadesin tufai: Todu u fan mattu gi idat tufai `nai makat ta ayudan maisa hit piot desde ochenta años para mona. Siña gaige asaguamu para un` inayuda lau guiya lokue` mamadedesi taimanu pinadesisimu. Makat.

Ayudu para un` malañgu na amku` gai atburotu. Giya Japon bula manpara gi che`chu` niha pot para uma-attende mañainan niha. Dispues madispone i man-amkiu`, i patgon dispues pumadesi malagnos ginen i gima` pot tai salape para atkilon. `Nai tai che`chu` pues ni para u akuden maisague` sumen makat.

Maseha man-suette hit sa` kuttura-ta kumatsu ayudu para mañaina-ta lau hombre este makat gi maseha haye ni man-ayuyuda. Makat lau nafan su`anu hinassun miyu sa` tat mas mañge` yan satisfichosu na siñiente i un` kubre nesessidat mañaina-mu.

Mina` makat sa` `an kumama i prohimu siempre todu nesessidatña hagu ni mamumulan para un` chine`gue. Desde ma-assisti gi neñkanu`, managasgas yan sensian konkariñu siempre ta usa giya siha. Siña nina` chatsaga ha`animu pot guaha lokue` familia-mu lau un` usune sin ditension sino finatane`.

Ayu mas mannamase` i mantai asagua sino famaguon. Manhalum i parentela yan ayudun niha pot mauleg na sensian kilisyanu.

Esta na`mase` lokue` i malañgu sa` ha komprende na makat na obligasion mañetbi inutet. Ayu solu nina` siñaña i para un` sinañgane “Si Yuus Maase`”. Puti na finapus gi todu atmos banda.

Daibites: Chenot daibites mafañagu `nai sessu un` nasetbe asukat ya una` malañgu parahiya-mu (pancreas). Este na patte gi halum sistema-ta i lumalagnos naturat na asukat guatu gi tatautau-ta.

Yangin inipus kinano`mu asukat, pues unna` bulachu fuñgsion parahiya-mu. Guaha siempre `nai manlagnos sino ha gu`ot tatte naturat na asukat. Estague` `nai un` tutuhun matompu`.

I asukat ti ayu ha` i mames ni ta fafahan gi tenda gi halum sinku libra na botsiyu. Gaige megai asukat gi hinegsa`, pan yan pastre siha, yan gimen soft drinks yan otru siha gimen ni manmames.

`An sessu un` gulusune, adumididi` una` tai bale fuñgsion parahiya-mu. Un` tutuhun pumadesi tinahuñg fuetsan tatautau-mu. Libianu nina` kama hau `nai ni para un` kahulu` ti siña.

Otru pinadesi `nai fuetsau reñihon-mu una` facho`chu` mas ke regulat. Mas un` sapet `nai sessu un` poñga asukat, asiga yan mantika. Matai dispues reñihon-mu `nai hinatme haga`mu manadan aplacha. Uniku remediu i makulan makina gi sentrun daialasis.

Mientras makukula haga`ña i malañgu guaha hanum yan amot siha mañaunau gi mana` gasgas haga`mu. Ti komprendiyun lau gi halum siñku años siempre u deskansa i prohimu. Estague` mamakatña mana` gasgas makina haga` matai reñihon.

Hinemlu`: Teñga sige hit man-malomug para ta adahe hinelom`ta kosake siña manma`ug hit esta i sientu años na idat.

Mauleg yangin pot hinemlu`. Lau `nai hu dibina hafa` balihu gi sientu años fuera de para malalade ni famaguon-hu, kase kontentoña-yu` madispone gi sitienta años. `An para bai lalauya halum yan huyuñg, kase mas mauleg yangin mapega-yu` gi sagahu `nai ti bai fan estotba.

Puru ha` siempre gastu. Debi u guaha pipulan, kusuneru yan labandera para u kabales i setbisiu. Piot ya guaha na biahe `nai tihu hagu` i kemun. Kumuha` ti ha troñku-yu` i mamumulan. `An taya ganas-hu siempre fuetsau hana` kalamut-yu` ni na`hu pot debi bai chochu diariu. Tatnai sisida!

Makat hinanau amku` `nai todu hagas makalamya na modumu maliñgu kulan hinanau galaide para i puntan tasi gi lemlem tautau. Fanayuyot ya un` mana` deskansa ya u fan libianu lokue` i familia.

John S. Del Rosario Jr. | Contributing Author
John DelRosario Jr. is a former publisher of the Saipan Tribune and a former secretary of the Department of Public Lands.

Related Posts

Disclaimer: Comments are moderated. They will not appear immediately or even on the same day. Comments should be related to the topic. Off-topic comments would be deleted. Profanities are not allowed. Comments that are potentially libelous, inflammatory, or slanderous would be deleted.