Benefisiun grasia

`Nai umasoda`yu` yan un` amku` sessu ha usa ayu na palabra i “grasia”. Sige hu guadog haf` sustansiaña segun un` attikulun relihion. Poduñg gi tres kategoria: Fuetsan Saina-ta, linala`ta yan satbasion.

I Saina: Diariu, ta benefifisia todu nina` huyoñg i Saina desde neñkanu`, trahe, kareta, yan otru siha bendision nesessidat ni mafattu ginen guiya. Huñgan ta fachochuchu`e lau hombre offisiota guiya prumebeniye.

Linala`ta: Gi kareran ha`anita man-mana`e hit offisiota para ta aligau mantension familia. Guaha `nai masuette hit hatsadan sueddu `nai mas hana`e fuetsa i familia mamahan nesessidatña. Lokue`, gi otru manera tat kumu peskan tasi mabendise biahita `nai mana` mehna kinine`ta para usuta.

Satbasion: Ta petsige asuntota sinparat. Ti todu tiempu felis pot guaha `nai man-lotgun hit gi hoyun barañka na katasada. Ha sedi hit i Saina tiempu para ta ta`lun rumipasa ya tana` dinanche haf` ta petsisige pot satbasion. Bittun sinetsot yan inasi`i mañasaunau guine na ohas ha`anita.

Kuestion: Huñgan, mañgilisyanu hit. Megai umembrasa katolisismu—relihilion Katoliku. Guaha `nai in` hassu haf` na difirensia relihion yan espirituat? Kau parehu sustansian i dos?

I relihion pot haf` hineñgemu tat kumu relihion Katoliku. I espirituat gaige este gi haf` relasion-mu yan i Saina diariu. I tatatte siempre sinsiyu na pinetsige umosge tinagu` i Saina. Diariu gasgas na pinetsige yan mangagau asi`i giya guiya pot ti un` hasñgun na linache. Guiya i luserun ha`ani-mu desde oga`an estake machum i atdau gi sanlagu.

Hinimidde: Gigon un` sedi kustumbren champada na un` hinatme, pues lamegai na deniskontentu yan chinatsaga para un` pinalo`pu dispues.

Hafa este na kustumbre? Gaige na todu i tiempu layu` hau pot suetten i otru `nai un` chachanda haf` na guiya ya ti hagu? Aplacha` na korason piot ya sessu unna` pinalo`pu ni manmala`et siha na palabra.

Maulegña un` diseha yan bendise suetten prohimu-mu. Siña dispues nina` chage hau ni suetteña. Na geftau hau mauleg na diniseha gi otru. Ti umahñau siempre lokue` u fattu suette-mu. Gineftau, pinasensia yan hinimidde!

Minaipe: Hafa kumilulog huyuñg siempre u fattu tatte. Kulan parehu yan che`chu` tailaye gi otru, siempre hagu gi uttimu pinalo`pu`. Finu mañaina minaipen tautau. Makat `an hagu dispues binalutan nu ennau na matdision.

I otru ni mas na`mañau i minaipen animas `sino espiritu. Pot fabot muñga machansa sa` fotteña ke tinatiyen galagun gera. Desde hinassomu, deskansomu yan ha`animu kada ratu hau ma-estotba estake mangagau hau sinsiyu na petdon.

Guaguat: Huli`e antigu na areglun mañaina gi famaguon niha. Magahet na rektu piot gi bandan famaguon famalao`an. Un` primahu mapoñga gi bateha yan kusina. Dispues, humalum gi kuattoña ya ha kandalu-gue` esta`i sigiente oga`an. Dios mihu!

I pumalu mangai tareha desde munagasgas halum yan hiyuñg guma, muñgayu, mamatinas neñkanu`, yan otru siha che`chu` guma`. Naseguru na monhayan haf` tarehamu `sino umatotpe hau yan kuatta pat korehas.

Giya hame, ayu mas taftaf i preparasion amotsan oga`an. Desde `las kuattru sige nina` lagu kosake siña in` falague che`chu` tanores gi gima` Yuus. Dispues de misa, in` planta i amotsa. Debi bai`n nagasgas todu antes de oran eskuela. Diariu.

Chaleg: `Nai para umatai un` riku na amku` hana` ma-agañg i uniku lahiña para u presenta ni todu i guinahaña. Malagradesiyu na patgon lau mattu ha bisita si tataña gi hospitat.

Kontodu i hospitat inyun i amku` ni mahatsa gi fina` hogsu`. Todu siña un` li`e, punta pot punta, papa` esta i tasi. `Nai kume agonias manhalum i mediku siha ya mapulan ñaihon. Muna`lu tatte hinagoñgña.

Ha atan i lahiña ya ilegña: “Todu i un` lili`e entalu` este, katan, luchan yan tatte, kontodu este na hospitat iyoghu para iyomu. Ennau i dies na lepblun bañku kada unu `nos kuantos miyon pesus gaige kumu salape`hu, para salape`mu”.

Bastara ke pitbetsu i paire, hafa` tutuhu lago`ña lagu` kaiman ya ilegña, “Ya hafa tatahu siña bai choguiye hau antes de un` diñgu-yu`?”

Ineppe as tataña, “Na suha adeñg-mu gi hos oxygen sa` un` punu`yu`!” De dios!

Tuba: Teñga `an hu bisita mañainan mame giya Matansa hu dalalag i amku` para i lanchoña gi papa` hegsu` Kalabera. Sige man-rempesa gi oriyan tinanum dagu yan nika dispue hana` fañochu i babue. Mañgamyu` niyog para i manog.

Humanau dispues ya ha rikohe tuban mames gi `nos kuantos troñku. Ha ponche` yan sitbesa ya ha uñgag-gue`. Hana`e-yu` gimen-hu para bai chage. Antes de bai`n kaikai` ham para i gima` esta hu tutuhun umaronsada. Tihu tuñgu` na na`bulachu mames tuba. Ai chalelegña `an matombayu` gi fina` sakate.

Katdu: Pinegsai ga`ga` gi lanchu pat tatten guma` mauleg na mantension gi tiempun eskases. Libianu un` usa para amotsa pat senan familia piot i manog. Dos na poya sopbla paire na katdun manog fresku.

I pinegsai babue lokue` mauleg na totchen familia. Desde flitada, estufau yan katdun to`lañg ha kubre nesessidat-ta fina` totche. Mangai pinegsai ham antes gi lanchu fuera de tinanum `aggun natibu yan fina` golai. Mauleg na katsu entalu` pinegsai yan tinanum.

Gualu`: Megai gi man-cha-idathu chumage che`chu` gualu`. Makat pot bula usun kodu desde manyabau, mandismonta, manhale`, yan mañguha. Mauleg na masahalum para un` yute` antes de oran deskansu. Magahet na kontodu halum te`lañghu manyafai gi uttimun ha`ane.

Sumen namagof `an felis tinanum `aggun tat kumu choda, sune, kamute, dagu yan golai siha. Gi mattiempu sumen chadeg i troñkun choda poduñg. Ayu mansuette i tinanum ni mangaige gi papa` odda` tat kumu sune yan kamute.

Hinemlu`: I usun niyog appruebau na mauleg para hinemlu` tautau. Ti parehu mantikaña yan taiguihe i ga`ga` tat kumu guaka yan babue. Chenot hamalefa (dementia) gi `nai man-amku` hit prinibeni yan otru siha chinatsaga.

Poresu na tafan a`ayuda pumunu` ga`ga` niyog ni humatme hit guine gi alacha. Mientras tantus, nasetbe i niyog gi sentadan familia sa` sumen mauleg para hinemlo`ta. Usun niyog gi guihan, katnen manog, babue yan guaka, paire para i tatautau-ta.

John S. Del Rosario Jr. | Contributing Author
John DelRosario Jr. is a former publisher of the Saipan Tribune and a former secretary of the Department of Public Lands.

Related Posts

Disclaimer: Comments are moderated. They will not appear immediately or even on the same day. Comments should be related to the topic. Off-topic comments would be deleted. Profanities are not allowed. Comments that are potentially libelous, inflammatory, or slanderous would be deleted.