Previous Story
Asunton Linahyan para 1999
|
Posted on Jan 05 1999
Maseha nuebo i sakan, ta huhuñgog ha` pañgpañg didog na napun chinatsaga ginen 1998 ni tumatitiye hit esta pago. I kuestion: Kao para ta talon dumandan i mismo sunidon imbidio yan inafatane` pat ta tulaika ennao na maña pot para ta ayudan maisa hit sumatba i problemata antes de u sala`.
Dinanche yangin i ineppeta i tatate sa` huñgan didog ta fafana` na sakan gi bandan ekonomia. Kaiha Japon ha areglan maisa halom gima`ña. Estake para u areglao ekonomiaña, sumen presiso na hita mismo ta areglan maisa halom gima`ta osino mas basnag yan mafondu i galaide`ta.
I ginagao komunidan bisnis pot alibio ginen i gobietno–administrasion yan lehislatura–ti doku` na maisa gi hilo` aire. Diaro na pinadese ginen manbibisnis pago. Guiya este siha na inbestadot (investors) i hagas umayuda hit pot mas ke 20 esta 30 años na tiempo. Gi tiempon abundansia, tai minagtos ayudon niha gi nesessidatta gi hechuran kontribusion tax.
Lao deste mapos na sakan, man-inaminasa i los probes nu i sagon ekonomian Japon yan Asia, piot ayo siha i sumupopotta i industrian turista. Guaha 1,080 gi entre siha humuchom bisnis niha sa` dañkulo na maribaha i numeron turista guine. Punta pot punta, megai lugat bisnis pumega “For Rent” na katton siha gi bintanan bisnis niha.
Na` triste na pinadese sa` kontodo hita ha affekta dimasiao.
Taya` linachiña i para ta ebalua hafa sesso ginagao niniha pot para u fan siña manhagoñg gi halom este na chinatsaga. Debi lokue` i bandan gobietno u ekuñgog hafa sentimenton niha i los probes ya u ekstende ayudo amano i siña na chinadeg. Yangin ti ta nae` ayudo, pues hita gi uttimo besis man-inisague sa` siempre ha huchom lokue` pettan niha sin ditension.
Gi hilo` este, mas siempre menos i rinikohen kontribusion tax ni tana` sesetbe pago gi todo setbision publiko. Lao yangin ta ayuda siha guine na ginagao, guaha chansa na unae` animo sumustene bisnis niha ya ginen ennao, siempre lokue` man-na`halom kontribusion tax para i kahan Marianas. Maila tana` fan satton hit gi hafa propio debi ta chogue pot satbasionta gi halom un` didog na chinatsaga. Si Yuus Maase` yan ghilisow!
