Kantan “Love Me Tender”

Man-hanao ham yan i boys para fina` salon karaoke `nai duro man-mama` Elvis Presley ham. Duro i kanta, duro i gimen yan duro lokue` i famalaoan (waitress) ni fumatachuchuñge ham mana`pagpag kanai niha kulan mohon tai achaigua guetgueron mame.

Mientras mas manma-ulos ham nu i duron pagpag kanai, mas in`sede na u fan mañule` guaguan na gimen palaoan. Duro malotge i kobransa mientras ha u`ulos i doli na sensian lahe ni binatsala papa` nu i atbansao na idat. Todo duro yan todo bali na esta man-malefa ham nu i ora. Dios miho!

`Nai sige mona i pueñge, kada uno ha atrebigue` kumanta “Love Me Tender”. Umaya yan si kaduka, mas hana` hihotgue` guato gi as pal. Mas man-manso yan man-atotgante piot sa` “Love Me Tender” i makakanta. Para i bulachuho, sige de hu dibina haf` na mampos esta man-manso i famalaoan. Dispues `nai hu repapara na man-gaige i kanai i boys gi oriyan sinturan niha.

Hu fa` fontunyo` `nai ensegidas manmamaisen dalai na chinadegyo` sinago. Hu batbaruye umoppe na tatnai hulie` ha guot senturan asaguan niha, muchomas, makantaye i nanan guma`. Ai na grasia sa` hu atileg fanson niha un` rato. Sige masablasosyo` pot imbelikeruho lao sige ha` hu repite na nuebo linie`ho na adelanto giya siha.

`Nai pañgpañg `la una-i-media, ti mahñao hu deklara na manae`yo` siempre nu i maletaho. Sige hu soyu` i boys na bai`n fan hanao. Ni unoyo` ume`ekuñgog sa` man-mamatmos gi halom gapothilon famalaoan yan todo klasen chigchig chiko. Ai dios miho! Hu faisen un` waitress para baiho manae` nu i kuentan mame. Ai, kanaha`yo` senmatai `nai hulie` na mas ke $400. `Nai hu annunsia kuanto i kobransa, todos man-machapag ginen i labios i girls. Ilegho, ai na pairen annunsio `ste. Manmanlagnos enfin todos para uma`apase i dibi.

Sige ham huyoñg para i kareta. Tat` ti umaronsadada. `Nai in` tulos ham luchan para i gima`, sige man-afaisen haf` taimano na taiguihe na kantidan kobransa. Ensegidas man-oppe uno na fanata`lo ha` `nai mañganta “Love Me Tender”. A Saina na duron chaleg. I otro biahe man-afaisen ham talo para bai’n fañugo gi karaoke. Man-
oppeyo` na maulegña bai’n usune i esta monhayan in` fahan na setbesa osino manma “Love Me Tender” ham talo. Ai na guaguan “Love Me Tender” ya guot` sentura ha` chiña yan chikon chago` piot sa` ti in` brochas nifen mame nu i Pepsodent, ai ya yai!

****
Humanao i tata yan lahiña para i gima` un` Okinawa para u famahan guihan antes de geran dos. Tinago` i patgon para u rikonose kuanto baliña i libran guihan. Dispues de masañgane kuanto, ilegña i tata pot fabot faisen kao siña hana` labarato. Man-oppe i peskadot Okinawa “chatsaga”. Era “chatsaga” gi fino` niha kumeke ilegña “kuanto malago`mo” osino siña un` lañgag. Malalago tatte i patgon ya ha sañgane si tataña nu i fino` i peskadot.

Esta a`asu ni binibuña ya ilegña: “Chatsaga? Siempre ta a`alie` dispues ya hu fanue` hao taimano pumeska, pindihote!” Ai, magahet na debi ha` ta atetuye pareho palabra para ta ketuñgo` hafa sustansiaña.
****

Hu e`ekuñgog i kantan kompairegho gi radio gi mapos na semana. Ilelegña i kanta: “`stabayo` gi kanton tañke, kana` mamataiyo` ma`ho….” Entre guaho ha` ilegho “Ai amigo, gimen `nai osino matai añglo` hao pot gago`mo….” Si Yuus Maase` yan ghilisow!