Gueko na probision gi papa` kontrata

Gi medio 1970 siha na sakan, ta bota 78 pot siento na manmalago` hit mañaonao gi papa` familian politikan Estados Unidos de America. Lao guaha chinatsaga sa` tana` saonao dos probision `nai kontodo i mas man-estudiao na abugao konstitusion matuñgo` na ti u tacho este na probision siha yangin machule` halom gi hechuran keha gi supremo na kotten America. Este dos asunto tineteka:

1). Direchon mayoria gi maseha mano na komunida gi halom tano` demokrasia manmanda gi todo asunton yan checho` linahyan. 2). Direchon sudadanon Estados Unidos de America gumai propiadat tano` maseha mano gi papa` banderan Amerikano.

Para ta komprende hafa sustansiaña prinsipion mayoria manmanda, ti siña na iya Luta yan Tinian para u pareho numeron senadot niha yan Saipan `nai mayoria gi residenten Marianas mañasaga. Ni tana` daña Luta yan Tinian taotaoña, ti u mas ke ocho mit (8,000) na numeron taotao.

Saipan, guaha mas ke 40 mit na residente ni umapagagaye lamayot patte gi nina` huyoñg kontribusion tax. Kumeke ilegña na debi Saipan umanae` mas membro para i sanhilo` na guma`. Estegue` i keha ni gaige pago gi Supremo na Kotten America.

Yangin u falagnos i disision ginen i supremo na kotten America (US Supreme Court), kanaha` asegurao na este na linache siempre umakorihe `nai umanae` mas membro Saipan gi Senate osino sanhilo` na guma`.

Dañkulo i chansa lokue` na i dos dikiki` na tano (Luta yan Tinian) umaribaha membron niha gi kuetpon sanhilo` na guma`. Hu diseseha na u huyoñg taiguine i disision ginen i mas supremo na kotte pot para ta tulaika este na linache `nai tasede i minoridat mandispone asunton linahyan para i mayoria.

Kumeke ilegña na i presente na areglo menos representasion para Saipan sa` mas dañkulo na numeron taotao kada senadot ha represensenta lao metgotña i fuetsan minoridat ke mayoria. Lache este na hinasso ya debi i senadot Saipan siha u fanacho ya umadalalake hafa i dinanche gi direchon i taotao siha ni ha represesenta.

I otro asunto pot `nai ta aksepta mansudadanon Estados Unidos de America. Direchon kada sudadanon America gumai propiadat maseha mano `nai gumugupo i banderan Amerikano. Pot este na rason na ayo na probision i para ta ñega direchon ti taotao tano` (lao mansudadanon America) mangai tano` guine dañkulo suspechogho na ti u tacho gi hechuran keha ni gaige lokue` gi menan US Supreme Court ni nina` halom Estadon Hawaii.

Yangin esta ta sede i prohimuta sudadanon America mañaonao gi botasion lehislatura, otro siha na botasion linahyan tat komo propositon tinilaika gi konstitusion iya Marianas, hafa na para to choma pago manmanbota pot tano` Marianas? Afañielos, debi este na atetu osino mañan natibo de tatulaika sa` ta aksepta manpatte petmanente gi papa` familian Estados Unidos de America gi medio sitienta siha na sakan.

Gi papa` sisteman demokrasia, guaha direchon kada sudadano gumai propiadat kao Saipan osino sanlago, enfin este na asunto direchon kada sudadanon America. Hita lokue` ni natibo mansudadanon America hit deste 1986. Yangin para ta ñega direchon otro prohimuta sudadano pot kulotña, lache ennao na hinasso sa` ta abibiba eksision discriminasion. Pot este na rason na kada uno giya hita debi ta kontra este na kuestion gi hechuran balotu pago na eleksion. Si Yuus Maase`!