Primet pasu gi todo kinalamten

Todo antao siha na kinalamten taotao, siempre matutuhon gi primet pasu, dispues sige mona gi halom megai na barañkan chalan.

Piot ayo siha na taotaota i manbibisnis, matutuhon siha gi dididi` na fiñkas niha ya diaramente manae` animo para u fan mama` ganansia.

Un` amiguho mampos mauleg na kusinero. Brabo yan paire mamatinas todo klasen neñkano` natibo yan fina` mames. Ni un` biahe `nai hu huñgog umugoñg pot yayas. Todo i tiempo listo mamatinas kao sentadan para bisita pat para famliaña mismo.

Sige de ha estudiaye hafa na sentada yan niha i natibo. `Nai halie` na fahna finatinanasña, mas hana` paire sa` dañkulo na ma-umenta i numeron taotaota ni fumatotoigue ayo na sagon chumochu (restaurant) `nai machochochu`.

Mientras tantos, sige lokue` man-estudia para u tutuhon mismo bisnesña kusinan natibo. Un` dia ha disidi para u tutuhon maseha adumididi`, lao enfin esta ha establese kusinaña yan $75 gi halom pottamonedaña.

I asaguaña animo gi menan hotnun halom guma`. Guiya duro muna` lago gi halom kusinan sanhiyoñg. Adumididi` sige guato i natibo. Gi halom menos ke un` año sosobla oda ginen taotaota. Esta ti ha huhulat umakude sa` man-a`atatiye halom i odan neñkano` piot antes yan duranten i mapos na haanen gupot siha.

Diberas na mampos ha gana koransonho i animo gi dos umasagua ni katkuet kinalamten, taya` finatane` gi responsablidat mamikan katne, manyaka` harina, hinegsa` agaga`, B-Steak, kilaguen manog ni añglo`, tininon kustiyas babue yan pastre siha.

Deste ogaan` gi alas ochu matutuhon manmamika para i odan sigiente dia. Antes de tatalo` pueñge, dumeskansa i dos asagua. Gigon pagpag las dos gi chatagmag, kahulo` ya matotne i stof (gas stove) ya duro man-na`lago. Dispues de masa, matutuhon manmapakete ya machule` guato gi lugat `nai mananañga ayo na sentada.

Guiya este na petsona i amiguho as Ben Aldan (Koman) ni sumasaga pago Koblerville. Mauleg esta kinalamten i bisnesña gi neñkano` natibo. Bula pago manmafatto manman-o`oda para fina` gupot offisina osino familia. `Nai hu faisen kao paire pago kinalamten bisnesña, chumaleg ya ilegña: “Animo ha` ya guaha tat` ti siña yangin metgot ditetminasionmo gi hafa un` disidi para un` petsige”.

Mauleg finatinanasña i Natibu Kitchen ya preparao i amiguho umadelanta mas fasilidatña para u kubre i manmamamaila` siha na oda ginen taotaota.

Hafa na pot dos besis mañge`yo` pot este na asunto?

`Nos pot para baiho fama osino fatta na paire na kusunero i amiguho, lao pot para baiho na` fan manhasso todos na todo man-antao siha na bisnis osino pinetsigen adelanto gi maseha haye na taotao, siempre un` tutuhon gi primet pasu maseha makat i tutuhonmo.

I para un` fatto hulo` gi un` señala na planumo mas ñahlalañg piot ya un` upos esta i primet pasu. Konsige ya chamo fan a`atan tatte. Nae` animo sa` siempre un` dia un` gana regalumo maseha sumen anako` i karera mona.
****

Gi todo animumo, ala kuenta un` kakayon mas yano yan manana na chalan para i manatatte. Huñgan, taya` leblo para tatatiye taimano man-kreansa patgon piot `nai matto gi idat echo suttera osino suttero.

Muñga hinalañg ya dimas de un` dagao i tuaya, guot nafitme fangotemo ya un` fangagao minesñgonmo gi un` fafana` na katgo. Hombre i dos amko` mamattit siha megai besis gi silensio na pininite, lao ni unabes `nai ta huñgog man-ugoñg.\

Pues muñga hinalañg. Espiha ya unna` guaha kualidat na tiempo para hago, i asaguamo yan espesiatmente i famaguonmo sa` ti makinan lulog ennao siha na mangatbon famaguon sa` mantaotao. Atetuye sa` magahet tat` mas ginefsagamo komo i primion man-felis todos hinanao niha. Si Yuus Maase`!