Man-ñahlalañg na asunto siha

Hu lie` karetan amiguho gi un` guaguan na batbero. Hu birayo` para baiho hu bisita. Gi hinalomho, estaba na malalasgue papakesña. Hu faisen hafa i okasion, ilegña “Happy Valentine’s”. Bira birada hu kase kao esta inutetgue` na ti siña guiya mismo u utot papakesña. Ilegña: “Hago ha` ti guimuaiya linasan un` bonita na hobensita”. Magpo` i intension Valentine!
****

`Nos kuantos minutos dispues, humalom otro amiguho para u mabatbas. Aike, sa` esta umachichigo` `nai sige mahabune barañkan fasuña. Gi kinekeyoñgho, hu sañgane na kalan mohon un` bihon 103 años ni manasasaga gi hospitat sa` ti siña esta ha ayudan maisague`. Duro chumaleg si pindeho. Lao buente propio i setbisio sa` haf` na gorilla batbasña i paire.
****

`Nai ma-udaiyo` gi karetaho, mamamaila` otro atuñgo`ho para u madasai. Ginen i chago`, kalan i defunto Elvis Presley alifogña. Dispues de umihot, hu repara na kalan i mas dañkulo na deñgdeñg hechuran alifogña. Duro chaka chalegña `nai hu faisen kao ginen i gualo` ha`gue` mage. Era ha gacha` na hagas hu a`atan i alifog deñgdeñg gi hilo` haiña. Dios miho!
****

Duro si datsala chumaleg gi telefon celery (cellular) mientras tumotohge gi papa` agaga` na kandet. Mampos i chaka chaleg na malefa na hagas matulaika guato gi betde i kandet traffic. I pumalo gi tatteña duro lokue` mana`katiye para u tulosgue`. Dios miho i telefon celery bidadaña gi chalan publiko.
****

Sumen magahet i fino` man-amko` na `nai hoben yan brabo i taotao, hasan ha dumeskansa gi man-makat siha na checho`ña, kontodo i ti siña hana` siña. `Nai sige mona` gi inamkoña, esta ni para u dilog chatsaga. Ha tutuhon bumisita tatte ayo na tiempo `nai sumen brabogue`. Ilelegña dispues “Hagas hu tuñgo`…” lao matto gi atrasao esta. Adahe hinemlo` miyo pot fabor.
****

Sesso antes mabutleha i defunto Dr. Torres pot amot APC. Lao pot mas ke 30 años na tiempo, sumen hasan ta huñgog na machuda` korason fulano osino fulana.

Pago na tiempo, klara na paire i amot APC piot ya sesso hao chumocho sentadan fritadan babue yan guaka, tinala` mantikan gaga` siha, abunen ayuyu osino mantika na katdon fanihe. Lao taya` binabaña i ta bira hit tatte gi APC sa` ala kuenta APC kumeke ilegña Amot Para Chamolinian. Biba Dr. Torres!
****

Ti tres dias dispues de madispacha i amiguho ginen i ICU, ha tutuhon talo dumaflogue fritadan guaka yan katdon patas. Hu atan kao ti ha repara hafa ha kakano`. Mamahlao `nai hu na`hasso na ti mauleg i neñkano` ni ha gulususune kontra i chetnotña.

Man-atan hulo`, lao pot no umamahlao i prohimo hu doblaye na i taotao lokue` mamatai ha` pot guinaiyaña. Man-oppe gi un` banda “Polu esta dispues `nai bai`n kuekuentos yan i medikuho”. Dios miho na inaguaguat si pindeho!
****

Kokoghuyoñg un` amiguho ginen kemon famalaoan. Huna` fan hasso na para famalaon solu ayo na komon. Man-atan hulo`, dispues papa`, ya ilegña: “Nañgga sa` kontodo este papa` munesesita i kemon de hemunos kao lahe pat palaoan”. Pindihote!
****

Hiniyoñgña, masakaiguan nu i pottamonedaña. `Nai matto gi lugat parking, masake lokue` karetaña ni pago ha fafahan. Gigon tumalag halom gi gima` niha, duro i asaguaña umachiko yan un` amiguña.

Humanao para i salon ya mangagao basu. Ha chudae` halom bineno ya sige de kumate. Humalom un` fuetsudo na amiguña ya kinase hafa ha tatañgse. Ensegidas ha hala i basu ya ha gimen. Malag i kemon dispues. Gi biradaña ha faisen talo i amiguña hafa na sige ha` kumate. Man-oppe i prohimo: “Sa` un` gimen i gimenho bineno ya siempre hago pago matai!” Dies segundo dispues tumalag hilo` dos adeñgña i prohimo. Dios miho!