Sensian hipokrito kontra Marianas

Si Congressman Norman Palacios yan Vice Speaker Alejo Mendiola man-introduse un` resulasion `nai ma-apunta huyoñg probleman famalaoan` benta gi entero mandañkulo siha na siuda giya America ni maprinta nu i San Francisco Examiner.

Ayo na attikulo ilelegña na i probleman putteria tineteka pareho ha` famaguon yan echo famalaoan giya lago. Mangaige este siha na problema gi siudan iya New York, Atlantic City, New Orleans, Las Vegas, Reno, San Francisco, Los Angeles yan Honolulu.

Ilegña i dos señores na antes de u fan mañogne i kontrarion iya Marianas pot mutoñg pachot otro taotao, na seguro na ha brochas fine`nina nifen niha .

Lokue`, pago na semana masoda` na guaha 1,500 esta 5,000 na famaguon famalaoan giya Honolulu mañasaonao gi industrian putteria. Dinanche i palabras i dos señores na ti propio na umapoñga Marinas `nai este na problema mas oppan yan dañkulo gi siuda siha deste Honolulu esta New York.

****

Sesso lokue` i dos señores mapoñga nu i gaseteron otro papet guine (Marianas Variety) pot subridan gaston kumarera para Saipan para uma-attende i huntan lehislatura. Tatnai matto gi hinasoña si pindeho (gaseteron i otro papet) para u katkula kuanto mohon mas para u gasta i taxpayers yangin gaige i sentron gobietno giya Luta osino Tinian.

Gi presente, kuatro kada tano` mañgarerera mage Saipan kada semana pot huntan lehislatura yan komite siha. Konsidera yangin kada semana man-hanao i 16 na representante yan tres na senadot Saipan para Luta pot checho` lehislatura. Dios miho, lamayot patte gi fondun lehislatura humanao para gaston fleti, hotel yan atkilon kareta.

Lache i para umakritisisa i membron lehislatura ginen Luta yan Tinian pot gaston fleti, atkilon kareta, hotel yan otro siha nesessidat.

Chatmiyo fan malelefa na mangai familia lokue` este siha na señores.
****

Mauleg sa` guaha dañkulo na inadahe gi gaston salape` publiko. Lao ti siña na ta sakrifisia appottunidat ma-establesen mas industria guine pot este na areglo. Kumeke ilegho na yangin guaha siha kompanian batkon aire mangai interes prumebeniye Marianas direktamente na setbisio ginen Japon, South Korea, Taiwan, Manila, Hong Kong,
Taipei yan otro siha lugat, pues debi ta gasta salape`ta para ta kayon mas appottunidat bisnis turista mage Marianas.

Yangin para tafan a`atan kada ogaan` gi fina` sagan gumimen kafe sin prubecho, megaiña siempre `nai kontodo hita yan hita man-adage sa` ta talon sumañgan i hagas mansañgan siha. Mauleg ta komprende na taya` guine minan laña osino oru ni fahna gi otro tano`. Pot este na rason na debi tafañgalamten pot interesta mismo. Deste ñgaian i misirable na chumacha` neñkano`?

Lokue`, megai siha tinilaika gi kinalamten ekonomian entero elmundo ya sumen presiso na u guaha tiempo para ta estudiaye pot para ta komprende i huegon nasion siha gi oriyata. Pot ihemplo: Sesso ta taitai na guaha mas adelanto gi ekonomian Japon. Mauleg ennao na mensahe lao ti siña na ta aksepta komo asegurao estake u falofan este na sakan. Sige ha` Japon bumuente gi nuebo siha na rekomendasion areglon ekonomia.
****

Este i natibo, ande` mampos na finañago. Pot ihemplo: Gi tiempon Japones guine gi halom tano` tupu, manguafe` i natibo tupu ya ha manohu. Sin ayudo, ha blañko hulo` gi karetan guaka. `Nai matto oran `las kuatro, esta i Japones yan Okinawa` manmahuhuñgog manfoñg antes de umadagao hulo` i manohun niha. Esta i natibo guine na ora yayas sa` ha lachachachachai fuetsaña taftaf gi egaan`. Dios miho!