Nuebo na industria para Luta

Sumen namagof na mensahe i guaha fotmat na kinemite mafitma gi entalo i Mayot iya Luta yan Unkai na kompanian bino yan aguayenten Japones (sake) guine na semana.

I plano layeye pot para umababa fakterian mamatinas sake` yan bino siha ginen tinanom kamute. Maulge na ayudo para i fangualuan` siha deste Luta, Tinian yan Saipan. Areglo pago este na industria ha nesessita gi matanom kamute. Dañkulo na kantida manesessita, ennao i 300-400 tinilada gi mes.

Bintaha para i industrian bino yan sake sa` ti man-apase tax gi todo produkto ni para u bende giya America. Bintaha lokue` para i ekonomian iya Luta sa gumuaha nuebo na industria `nai siña manrikohe para uson mas kualidat na setbision publiko fuera ke chochu` siha ni para u fan mababa.

Achogha` u fatto pagyo, libre i tinanom kamute sa` gaige gi papa` tano`. Dispues de pagyo, u fan makusecha ya umatutuhon dinuebo ma-alado para i sigiente tinanom.

Huegon Kabayero gi tano` natibo

Guaha na kabayero kalagtos macheteña. Guaha lokue` malagtos padaraoña. Guaha tumuñgo lumamse macheteña, guaha ha` lokue` achogha` unnae` katkuet guasaon`, ñaño` gi todo biahe macheteña.

I kalagtos macheteña libre ha kone` i tropa para i tadoñg na halom tano` ya libiano ha kayon i chalan mona. I malagtos padaraoña, megai besis siempre `nai makat ha babaye chalan i manatatte. Man-yayas yan o`sun i tropa manmannañga.

Mas problema i karera `nai i ta añgoñgogho na kapitan tiha tuñgo` uson kompas para yangin manmaliñgo hit gi tadoñg na halom tano`. Para hafa mohon na u atrebigue`. Sañgan ha` mohon na ti segurogue` ni ha fafana` na responsablidat.

Ayo na kapitan i kalagtos macheteña yan ha tuñgo` uson kompas siña ha kone` hit para i chita sin u sapet i tropa. Ti mamahlao kumahulo` gi troñko para u kelie` kao dinanche i direksion ni ta hananague. `An lache, ha lagnos i kompas para u konfitma i direksion dispues ha señas i tropa mona.
****

Komprendiyon i dinisehan guaha siha na taotaota pumega i galun kapitan (gobietno) gi apaga` niha. Lao yangin gueko tinatemo ya taya` sustansiao mauleg bidamo para un` adelanta i linala` taotaomo, buente justisia giya hago mismo na un` talon umebalua hafa intensionmo. Yangin makat na responsablidat i un` guiguife na puesto, maulegña yangin gi hilo` hinimidde un` seha ya un sede i mas man-antao na kandidato umaregla i hagas un` diskuida hao na asunton linahyan siha gi mapos na dies años. Yangin ti un` aregla antes, pues tat seguro na siña un` aregla pago!
****

Planon para umafedelisa Marianas maulegña mohon na u famatkilo deste tutuhon si Congressman George Miller. Rason? Man-atotpe i grupuña yan grupon ginen entero elmundo `nai man-akontra gi mismo asunto.

I grupon Miller (US labor unions) sige machoneg propositon para umasustene chochu` para sudadanon Amerikano. Gi mismo tiempo, duro lokue` i ginen otro tano` siha masoyu` mas chochu` para i taotao niha gi tano` niha. Dios miho!

Dispues, i motibo na machochoneg nu i grupon human rights (direchon kada taotao) magahet na mau`udai gi hilo` kinimite para uma`adelanta linala` todo rasan taotao, pues echoñg yan dakon i ha chochoneg si Congressman Miller sa` pot direchon taotaoña solu ha petsisige.

Señor Miller, na` para i mames na hipokriton fasumo. Pago mas `nai un` konfitma ha huñgan hago i rai i man-rai siha gi halom chubasko na tasen manhipokrito gi entero elmundo. Dios miho! Gai ase` nu hago mismo sa` in` kemprende hafa sesso direchon mame komo sudadanon America. Si Yuus Maase`!