`Nos Kuantos asunto siha

Kanaha` todo tasen sanme`na giya Garapan manmapegaye banderan agaga`. Este siha na bandera ha signififika na piligro munañgo yan pumeska guine siha na lugat. Seriosu na abiso para i publiko pot bandan hinemlo`.

Era, masoda` ginen rinikonosen i Division of Environmental Quality (DEQ) na guaha siha bakteria gi hanom tase. Masoda` tinane` gaga` yan taotao gi halom tasen iya Garapan dispues de dañkulon uchan.

Kinilili` este siha na take` ginen i chalan siha. Humanao guato gi tase `nai sesso man-o`mag pareho ha` taotaota yan bisita. Sagan peska lokue` este siha na lugat ya todo peskadot manma-abibisa na chatniha humahatme 300 pe deste kanton unai huyoñg.

Pot fabot tatiye i ginagao este na abiso sa` seriosu mampos na chetnot yangin guaha nina`ye pot bakterian hanom tase osino ginen i guihan ni manmakone` guine siha na lugat. Este i mafananaan` “virus” na bakteria esta pipino` piot `nai ha hatme sisteman taotao. Guaddia mauleg famaguon miyo ginen este siha na tase giya Garapan.
****

Guaha `nai mamahonyo` kachu` para uson mangachoñg. Lamegai besis `nai hulie` na i finaan`ho esta a`paka` i sensin sanhiyoñg.
Kumeke ilegña na tinahoñg ais (ice) gi bandan peskadot ni kumone` este na kachu`.

I peskadot debi u komprende na responsablegue` yangin guaha hinina osino imbeninao ginen binenon kinene` kachu`. Ha tutuhon lumamas ennao na kinene` deste ora `nai humalom gi halom boti. Mas chadeg lamas `nai tinahoñg ais pot para umapresetba frineskoña. Muñga machansa pot fabot. Na` nahoñg ais yangin humuyoñg pumeska para un` guot frineskoña i kinine`mo. Chogues este komo setbisio sa` mas lokue` fahna i bentamo.
****

Si Santo Papa Juan Pablo ha konfitma i mina` tres na misterio ni sinañgan Santa Maria gi dos chelo giya Fatima gi Mayo dia 13, 1917. Era, ilegña si Santa Mariana na guaha un` Santo Papa para umapake giya Fatima.

I O`bispon iya Fatima umanunsia i mina` tres misterio komo magahet. Matto si Santo Papa Juan Pablo guihe gi mapos na semana para u bendise i mana` santos i dos chumelo as Jacinta yan Franco Marto.

Ilegña si Santo Papa na si Santa Maria umesgaihon chalan i bala ni dumanchegue`. Mannae` mit grasias pot ayudon i nanan i Sainata `nai nina` soplugue` ginen finatai.
****

Si Señor Keizo Obuchi, i primet ma`gas giya Japon, matai gi mapos na Dameñgo dispues de kumama un` mes pot machuda` haga` gi titanosña.

Dos dinisehaña i prohimo: Para guiya Prime Minister giya Japon gi tinilaikan i nuebo na siglu yan para u bira tatte gi homlu` na eskalera i ekonomian Japon. Ha komple i primet dinisehaña, lao dimalas sa` ti nahoñg tiempo para u lie` kao i areglo siha ni ha atorisa enfin para u famauleg tatte i poduñg ekonomian Japon. Mauleg ta hahasso si Prime Minister Obuchi gi tinayuhotta pago na semana.
****

Deste ñgaian i dinanche `nai lache? Estegue i dicho kuestion gi resuttan i kotte `nai kumeha si Juan N. Babauta pot mafaisengue para u huyoñg ginen i offisinan lehislatura. Mangana si Speaker Fitial. Konfotme si Babauta na u lagnosgue` gi halom 15 dias.