Kontribusion I Man-bibisnis

Bastara ke empleao gobietno-yo` pot 23 años, tatnai matto gi hinasogho durante ennao siha na tiempo impottansian kontribusion komunidat bisnis gi entero elmundo.

Estorian Marianas oppan hafa na tinilaika guaha gi modun linala`ta. Deste fangualuan` yan peska esta guato gi NTTU. Adumididi`, sige manhalom taotaota gi todo klasen puesto, lamayot patte gi bandan gobietno.

Hafañago este na tinilaika un` hineñge gi hinassota na ayo solu manfelis futuron niha i manma-emplea gi gobietno. Gi mismo tiempo, ta pega gi hinassota na para i mantai nina` siña i checho` praibet (private). Estague` rekueddon i Depattamenton Interior gi natibo siha.

Tinilaikan Sunido

`Nai manhalom hit gi tinituhon para ta gobietnan maisa hit gi 1978, este na hinasso sumaga gi halom taotaota, piot sa` guaha siete (7) años na fondu ginen i federat para uson ma-adelantan tano`ta.

Mana` fan manhasso hit, en kuando, na para ta usa mauleg i magarentia na fondun federat gi papa` i kontratan i Covenant. Mientras mas mona, mas menos i ayudon salape` ginen i federat.

Pot fitme mampos i pisun kontratan i Covenant na machuda` mage gi tano`ta miyon pot miyon na salape` gi medio ochenta siha na sakan. Pot primet biahe gi 1993, kapas Marianas kumatso todo gastoña gi operasion gobietnamento.

Este na ayudo matto ginen homlo` na kinalamten industrian Marianas guennao na tiempo. Estaya, manacho hit gi dos adeñgta yan menos ginagao ayudo ginen i federat. Taya` otro kumomple este na adelanto fuera ke iya Marianas.

Lao gi kuatro años malofan, ha tutuhon fontun i makinan karetan ekonomian tano`ta. Esta ni hita mismo tita tuñgo` amano `nai para u yute` hit i hagas paire na tumobetta. Entre fontun, matai, kalamten, pañko`, a`asu i makina sa` fatsu esta, yan todo klasen mayulañg gi karera mona.

I paire na tumobetta ti komprendiyon chinotña. Guaha `nai mañgahulo` hit para ta sugon lao ti siña ta soda` i yabe. `An a`asu i redieta` (radiator), kontodo plimenta tanana`ye gi hilo esperansa na u katga hit esta i mas hihot na soñgsoñg.

Hafa signifikasioña i hu sasañgan?
Bahu mampos i kinalamten komunidat bisnis. Mas ke 2,000 na bisnis humuchom siha. Mas menos rinikohen salape` para i kahan publiko. Mas ti siña ta kubre nesessidat publiko sa` megai na bisnis humuchom pettan niha.

Kontodo kapitan bulacho

Manliheñg ñaihon hit gi papa` un` troñko pot para tana` mapao dididi` i a`asu na redieta`. Sige hit manlalalo` sa` mayulañg i tumobetta.
Ni uno humasso antes na achogha` kareta, ha nesessita setbisio tat komo laña yan otro siha na areglo. Mantinane` hit manpaseho estake fontun ya matai i hagas lagse` na tumobetta.

Sige hit pago manmamokat gi papa` somnag. Guaha sumañgan na debi umapuno` i kandet kareta sa` u hokog gaselina. Dios miho!
Estague` na estao `nai mangaige hit. Na mafñot sinturon miyo sa` kaiha u kalamten talo i tumobet Marianas. Ni makinista ti siña masoda` sa` kada ha pacha pot para u aregla, manlalalo` hit kulan mohon tatuñgo` hafa sesso problemaña i karetata.

Lao sige ha` i man-sabio man-asañgane na para umapuno` i kandet sa` u hokog i gaselina. Kontodo kapitan bulacho!